លួច​ស្រលាញ់​កូនក្រមុំ​គេ​ប្រច័ណ្ឌ​រហូត​ច្រឡំ​ដេញ​កាប់​បង​នាង​របួសធ្ងន់​ និង​ស្រាល​២​នាក់ ​ពេល​មក​លេង​ផ្ទះ​

ថ្ងៃ សុក្រ ទី20 កុម្ភៈ ឆ្នាំ2015 ម៉ោង14:12   ផ្នែក: សន្តិសុខ និង សង្គម    ដោយ: សឿន​

Pisey-02-2015-20-full-N1

ភ្នំពេញ ៖ សមត្ថកិច្ច​នគរបាល​ប៉ុស្តិ៍​ភ្នំពេញ​ថ្មី ខណ្ឌ​សែន​សុខ បាន​ឃាត់ខ្លួន​បុរស​ម្នាក់​ពី​បទ​បង្ក​របួស​ស្នាម​កាប់​គេ​របួស​ធ្ងន់​ និង​ស្រាល​២​នាក់ ដោយសារតែ​ការ​ចិត្ត​ប្រច័ណ្ឌ​លួច​ស្រលាញ់​កូនក្រមុំ​គេ​តែម្នាក់ឯង​។​

 

ហិង្សា​នេះ​បាន​កើតឡើង​កាលពី​ម៉ោង​២១​និង​៣០​នាទី​យប់ ​ថ្ងៃទី​១៨ ​ខែ​កុម្ភៈ ​ឆ្នាំ​២០១៥ នៅ​ភូមិ​ទំនប់​សង្កាត់​ភ្នំ​ពេញ​ថ្មី​ ខណ្ឌ​សែន​សុខ​។ បុរស​ដៃដល់​ដែល​ត្រូវ​បាន​ចាប់ខ្លួន​នោះ​ឈ្មោះ ​ពុធ រចនា ភេទ​ប្រុស ​អាយុ​២៦​ឆ្នាំ​ មុខរបរ​ទិញ​លក់​អេតចាយ​ មាន​ទីលំនៅ​ភូមិ​ទំនប់ ​សង្កាត់​ភ្នំពេញ​ថ្មី​។​

ចំណែក​ជនរងគ្រោះ​នៅក្នុង​ករណីនេះ​ឈ្មោះ ​ស៊ិន សុខ​នី ​ភេទ​ស្រី ​អាយុ​២៧​ឆ្នាំ និង​ម្នាក់​ទៀត​ឈ្មោះ ​ឈួន សា​ម៉េ​ត ភេទ​ប្រុស ​អាយុ​២៨​ឆ្នាំ មាន​ទីលំនៅ​ក្នុងភូមិ​ទំនប់ ​សង្កាត់​ភ្នំពេញ​ថ្មី ជន​ទាំងពីរ​នាក់​ជា​ប្ដី​ប្រពន្ធ​នឹង​គ្នា។​

បើ​តាម​ការ​អះអាង​របស់​ជន​រងគ្រោះ​ឈ្មោះ ស៊ិន សុខ​នី​បាន​និយាយ​ថា មុន​ពេល​កើតហេតុ​នាង​និង​ប្តី​មកលេង​ប្អូនស្រី​នៅ​ចំណុច​ផ្ទះ​កើតហេតុ​ខាងលើ ហើយ​ប្តី​របស់​នាង​កំពុង​ងូតទឹក ​ស្រាប់​តែ​ឮសូរ​ក្ដុងក្ដាំងៗ​ នាង​ក៏​ងាក​មើល​ស្រាប់​ឃើញ​ឈ្មោះ ពុធ រចនា កាន់​កាំបិត​បុ័ងតោ​មក​កាប់​លើ​ប្តី​របស់​នាង​ដែល​កំពុង​ងូតទឹក ​ភ្លាម​នោះ​ដែរ​នាង​ក៏​រត់​ទៅ​ជួយ​ឃាត់​ ត្រូវ​បាន​ជន​ដៃដល់​ម្នាក់​នេះ​កាប់​មក​លើ​នាង​ទៀត នាង​ក៏​ស្រែក​ឲ្យ​គេ​ជួយ ​តែ​ជន​ដៃដល់​រត់​គេច​ខ្លួន​បាត់​បណ្ដាលឲ្យ​នាង​ និង​ប្តី​រង​របួស​ធ្ងន់ធ្ងរ ត្រូវ​បាន​អ្នកជិតខាង​ជួយ​ដឹក​ទៅ​មន្ទីរពេទ្យ​។​

ក្រោយ​កើតហេតុ​នាង​ជា​ប្រពន្ធ​របួសស្រាល​បាន​មក​ដាក់ពាក្យ​ប្ដឹង​ន​នៅ​ប៉ុស្តិ៍​ ហើយ​ភ្លាមៗ​នោះ​នគរបាល​ប៉ុស្តិ៍​ ក៏​តាម​ចាប់​ខ្លួន​បាន​ភ្លាមៗ​ដែរ​។ នៅ​ពេល​សួរនាំ​ជនជាប់ចោទ​បាន​សារភាព​ថា​ពិតជា​បាន​កាប់​មក​លើ​ជនរងគ្រោះ​ពិតមែន ​ដោយសារតែ​ខ្លួន​លួច​ស្រលាញ់​ប្អូន​ស្រី​ជនរងគ្រោះ​មាន​ការ​ប្រច័ណ្ឌ​ច្រឡំ​ស្មាន​តែ​អ្នក​ផ្សេង​មក​ញ៉ែ​នាង​ដែល​ខ្លួន​ស្រលាញ់​នោះ ​ទើប​ទប់​កំហឹង​មិន​បានតែ​ជា​ការ​ច្រឡំ​សោះ ​ប៉ុន្តែ​ហួស​ពេល​ហើយ​ ព្រោះ​ប៉ូលិស​កំពុង​ឃុំខ្លួន​៕

Pisey-02-2015-20-full-N