ប្រធានាធិបតីកូរ៉េខាងត្បូងលោក លីមីយ៉ុងបាក់ បានថ្លែងកាលពីថ្ងៃសុក្រទី១៥ ខែកុម្ភៈ ថា កូរ៉េខាងជើងមិនអាចបោះបង់កម្មវិធីអាវុធនុយក្លេអ៊ែររបស់ខ្លួនបានទេ និងបានលើកហេតុផលថា មានតែរបបនេះដួលរំលំទេ ទើបអាចដកហូតការគំរាមពីក្រុងព្យុងយ៉ាងបាន។
ខណៈដែលក្រុមប្រឹក្សាសន្តិសុខបន្តជជែកដេញដោលអំពីការដាក់ទណ្ឌកម្មកូរ៉េខាងជើងដូចម្ដេច ចំពោះការសាកល្បងនុយក្លេអ៊ែរចុងក្រោយរបស់ខ្លួននោះ ប្រធានាធិបតីដែលចាកចេញនេះបាននិយាយថា មធ្យោបាយដ៏ល្អបំផុតឆ្ពោះទៅមុខនោះគឺព្យាយាមបង្កកចលនានៅក្នុងចំណោមប្រជាជនកូរ៉េខាងជើង។
លោកបានថ្លែងប្រាប់កិច្ចប្រជុំរបស់មន្ត្រីអ្នកមុខអ្នកការជាន់ខ្ពស់ ដោយរួមទាំងអតីតរដ្ឋមន្ត្រីរបស់រដ្ឋាភិបាល និងមេដឹកនាំសាសនានោះផងថា «វាមិនមានលទ្ធភាពឲ្យកូរ៉េខាងជើងបញ្ឈប់អាវុធនុយក្លេអ៊ែររបស់ខ្លួនតាមរយៈការសន្ទនា និងការចរចានោះទេ»។ លោកលីបានបន្តថា« យើងមិនអាចសង្ឃឹមថាកូរ៉េខាងជើងនឹងបញ្ចប់កម្មវិធីនុយក្លេអ៊ែររបស់ខ្លួននោះទេ លុះត្រាតែរបបនេះផ្លាស់ប្ដូរឬក៏ដួលរលំ»។ លោកលីបន្តទៀតថា« យើងអាចជួយ ប្រជាជនកូរ៉េខាងជើងឲ្យធ្វើការផ្លាស់ប្ដូរពុំបាននោះទេគឺរបបកូរ៉េខាងជើងធ្វើការផ្លាស់ប្ដូរដោយខ្លួនឯង»។
លោកលីកំណត់ថា នឹងចាកចេញពីមុខដំណែងនៅក្នុងរយៈពេល១០ថ្ងៃទៀត នៅពេលចប់អាណត្តិ៥ឆ្នាំ ដែលបានកត់សម្គាល់ដោយការកាត់ផ្ដាច់ស្ទើរតែទាំងស្រុងនៅក្នុងទំនាក់ទំនងរវាងក្រុងសេអ៊ូល និងក្រុងព្យុងយ៉ាង។ លោកលីតែងតែបានសន្យា ប្រកាន់យកនូវមាគ៌ាតឹងរ៉ឹងជាងអ្នកដឹកនាំមុនរបស់លោក ក្នុងការបន្តការផ្ដល់ជំនួយទៅឲ្យប្រទេសក្រីក្រកូរ៉េខាងជើង ដោយដាក់លក្ខខណ្ឌអំពីការរីកចម្រើននៅក្នុងការចរចាអំពីកម្មវិធីនុយក្លេអ៊ែររបស់ខ្លួន។
អ្នកបន្តវេនគឺលោកស្រី ប៉ាក់គីនហេ ដែលបានជាប់ឆ្នោតជាប្រធានាធិបតីបានធ្វើយុទ្ធនាការអំពីនយោបាយចូលរួមកាន់តែខ្លាំងជាមួយក្រុងព្យុងយ៉ាង ប៉ុន្តែការសាកល្បងនុយក្លេអ៊ែរកាលពីថ្ងៃអង្គារ ពិតជានឹងបានឃើញថានយោបាយនេះ នឹងទុកចោលរាប់ខែឬក៏យូរជាងនេះទៅទៀត៕
ថាលីយ៉ាន
