ប្រទេស​ចិន​ នឹងនាំខ្លួន​អតីត​មន្ដ្រី​អង្គភាពជាន់​ខ្ពស់​នៅ​រដ្ឋ​សភា​ មក​កាត់ទោស​ពី​បទ​ ប្រព្រឹត្ដការ​ទទួល​សំណូក​

ថ្ងៃ អង្គារ ទី17 កុម្ភៈ ឆ្នាំ2015 ម៉ោង16:01   ផ្នែក: ព័ត៌មានអន្តរជាតិ​ទូទៅ    ដោយ: កម្ពុជាថ្មី​

 

តាម​ប្រភព​ទីភ្នាក់ងារព័ត៌​មាន Reuters បាន​រាយការណ៍ថា ប្រទេស​ចិន​ នឹងនាំខ្លួន​អតីត​​នាយក​រង​នៃ​អង្គភាព​ទីប្រឹក្សា​ជាន់ខ្ពស់​រដ្ឋសភា​ចិន មកកាត់ទោសពីបទ​ទទួលសំណូក​ ក្នុង​នោះ​មាន​ទាំង​អំពើ​ស៊ី​សំណូក និង​លក់​តំណែង​តួនាទី។ រដ្ឋាភិបាល​បាននិយាយ​ដូច្នេះ​កាលពីថ្ងៃ​ចន្ទ ដោយបាន​បង្ហាញ​ឲ្យឃើញ​ពី​មន្ដ្រីជាន់ខ្ពស់​ចុង​ក្រោយបង្អស់​ ដែល​ធ្លាក់ចូល​ទៅក្នុង​អន្ទាក់​នៃ​យុទ្ធនាការ​ប្រឆាំង​អំពើ​ពុករលួយ​ដ៏​ស៊ី​ជម្រៅ​មួយ។

លោក Su Rong ធ្លាប់​ធ្វើ​ជា​នាយក​រង​ម្នាក់​ក្នុង​ចំណោម​នាយក​រង​ចំនួន​២៣នាក់​ ដែល​គ្រប់​គ្រង​ និង​ទទួល​ផល​ប្រយោជន៍​រហូត​ដល់​អាជ្ញា​ធរ​បានចាប់ផ្ដើម​បើកការ​សើុបអង្កេត​ស្រាវ​ជ្រាវ​កាលពីឆ្នាំ​ទៅមិញ​នោះ។

លោក​ Su បាន​រំលោភបំពាន​ទៅលើ​អំណាច​របស់ខ្លួន​ ដោយធ្វើ​ការ​ណាត់ជួប​ជាបុគ្គល​ ព្រម​ទាំង​ប្រតិបត្ដិ​ការ​ជាមួយ​នឹងបណ្ដា​ក្រុមហ៊ុន​ទាំង​ឡាយ​ដែលគេ​មិនបានដឹង​អត្ដសញ្ញាណ ជា​មួយ​នឹងការទទួល​យក​ប្រាក់សំណូក​ដ៏ច្រើន​សម្បើម​ នេះ​ជាការលើកឡើង​របស់​គណៈកម្ម​ការ​កណ្ដាល​ដើម្បីអធិការកិច្ច​ទៅលើ​វិន័យ​របស់​បក្សកុម្មុយនីស្ដ​ ដែលកាន់​អំណាច​ ហើយ​ដែល​កំពុង​ប្រយុទ្ធប្រឆាំង​ជាមួយ​នឹង​អំពើពុករលួយ។

នៅក្នុងសេចក្ដីថ្លែង​ការណ៍របស់​គណៈកម្ម​ការ​នេះ បានលើកយកមកនិយាយ​យ៉ាង​ដូច្នេះ​ថា រូប​គាត់​បាន​បំពានទៅលើ​អំណាច​របស់​ខ្លួន​ ហើយបានបង្ក​ឲ្យ​មានការ​បាត់បង់ថវិកា​របស់​រដ្ឋ​ដ៏សម្បើម។

ក្នុងឋានៈជា​មន្ដ្រី​របស់​បក្ស​មួយ​រូប លោក Su មិន​បាន​គិត​ដល់​តួនាទីរបស់​បក្ស​នោះឡើយ​ ដោយ​គាត់​គិត​តែ​លក់​តំណែង​ តួនាទី ឋានៈ ទៅ​ឲ្យ​មនុស្ស​ទាំងឡាយ ដែលនោះហើយ​នាំ ឲ្យ​អន្ដរាយ​ដល់បរិយាកាស​នៅក្នុងសង្គម។ ករណី​លម្អិត​អំពី​រឿងក្ដីរបស់លោក Su គឺ​ស្ថិត​នៅ​ក្នុងដៃ​របស់​អំណាច​តុលាការ​ ដោយ​រូប​គាត់​នឹងត្រូវប្រឈម​នឹងការ​នាំ​យកមកកាត់ទោស​នៅ​ឯតុលាការ។ លោក Su ពីមុនមក​បាន​បម្រើ​ការ​ជាជួរ​បក្ស​កុម្មុយនីស្ដ​នៅក្នុង​ខេត្ដ​ Jiangxi និង​ខេត្ដ Gansu។ បណ្ដាញផ្សព្វផ្សាយ​របស់ចិន​បាន​លើក​យកមកនិយាយ​ថា ការ​អង្កេត​ទៅ​លើ​ករណី​លោក Su មាន​ជាប់ពាក់ព័ន្ធ​ទៅនឹង​ពេល​ដែលរូបគាត់ស្ថិតនៅក្នុងខេត្ដ Jiangxi ហើយ​គឺប្រពន្ធរបស់គាត់​តែម្ដង​ជាអ្នក​ទទួល​សំណូក ទាក់ទិន​ទៅនឹងការ​ប្រគល់​ដីសម្បទាន​និង​គម្រោងសាងសង់។ នៅ​ពុំទាន់អាច​ដឹង​យ៉ាង​ណា​អំពី​ករណី​រឿងក្ដី​នេះ​ទេ ពីព្រោះគេ​មិន​អាច​ស្វែងរក​ការ​អធិប្បាយ​ណាមួយ​បាន​ពី​សាមីខ្លួន​លោក Su ឬពី​ក្រុម​គ្រួសារ​របស់​លោក​នោះ​ឡើយ៕

..