លក់​ដី​បាន​១៥០០០​ដុល្លារ​យក​ទៅ​ផ្ញើ​កូន​ក្រោយមក​ទារ​យក​វិញ​មិនបាន​ទំនាស់​គ្នា​រហូត​ចងក​សម្លាប់​ខ្លួនឯង

ថ្ងៃ ច័ន្ទ ទី16 កុម្ភៈ ឆ្នាំ2015 ម៉ោង12:59   ផ្នែក: សន្តិសុខ និង សង្គម    ដោយ: សឿន​

T-02-16-15-f-full

ភ្នំពេញ ៖ ស្ត្រី​ចំណាស់​ម្នាក់​បាន​ធ្វើ​អត្តឃាត​ដោយ​ចងក​សម្លាប់​ខ្លួន ដោយសារតែ​មាន​ទំនាស់​ក្នុង​គ្រួសារ ពាក់ព័ន្ធ​រឿង លុយ​១៥០០០​ដុល្លារ ដែល​ទើប​លក់​ដី​បាន​យក​ទៅ​ផ្ញើ​កូន ទំនងជា​ទារ​យក​លុយ​នោះ​វិញ​មិនបាន។

ហេតុការណ៍​នេះ​បាន​កើតឡើង​កាលពី​វេលា​ម៉ោង​២១​និង​៤០​នាទី​យប់​ថ្ងៃទី​១៥ ខែ​កុ​ម្ភៈ ឆ្នាំ២០១៥ នៅផ្ទះ​លេខ ច​១២ ក្នុង​និគម​ន៍ របស់​ព្រះមហាក្សត្រ ព្រះបាទ​នរោត្តម​សីហមុនី មាន​ទីតាំង​ស្ថិត​ក្នុងភូមិ​សំរោង សង្កាត់​ឃ្មួញ ខណ្ឌ​សែន​សុខ រាជធានី​ភ្នំពេញ។

សាកសព​ជនរងគ្រោះ​ឈ្មោះ ឈូក ដា​រ៉ា អាយុ​៥៨​ឆ្នាំ ស្នាក់នៅ​ក្នុងភូមិ​កើតហេតុ​ខាងលើ។ តាម​ប្រភព​ព័ត៌មាន​ពី​ក្រុម​សមត្ថកិច្ច​និង​កូនចៅ​មួយ​ចំនួន​របស់​ជនរងគ្រោះ​បាន​ឲ្យ​ដឹង​ថា នៅមុន​ពេល​កើត​ហេតុ​ស្ត្រី​រងគ្រោះ​បាន​លក់​ដី​ផ្ទះ​មួយ​កន្លែង នៅក្បែរ​នោះ​ហើយ​បាន​យក​ប្រាក់​ចំនួន​១​ម៉ឺន​៥​ពាន់​ដុល្លារ​ទៅ​ផ្ញើ​កូន ប្រុស​បង្កើត​ម្នាក់​ឈ្មោះ​ឈឿន សម្ផស្ស (​កូន​កណ្តាល​)

ប្រភព​ដែល​បន្ត​ថា ក្រោយមក​ស្ត្រី​ជា​ម្តាយ​បាន​ទាមទារ​យក​លុយ​វិញ​មួយចំនួន​តែ​មិនបាន​ក៏​មាន​ទំនាស់​គ្នា​ហើយ ទំនងជា​ដោយសារ​តែ​មាន​តូចចិត្ត​ចំពោះ​រឿង​នេះ​ក៏​សម្រេចចិត្ត​ចង.ក​សម្លាប់​ខ្លួនឯង​តែ​ម្តង​ទៅ។

ចំណែក​ឈ្មោះ ឈឿន សម្ផស្ស វិញ​និយាយ​បំភ្លឺ​ប្រាប់ មន្ត្រី​នគរបាល​មូលដ្ឋាន​ថា នៅ​វេលា​ល្ងាច​ថ្ងៃ​កើតហេតុ​គាត់​និង​ប្រពន្ធ​បាន​ធ្វើ​ដំណើរ​ទៅលេង​ផ្ទះ​បងប្អូន​នៅ​ភ្នំពេញ រហូតដល់​យប់​ពេល​ត្រឡប់​មក​ផ្ទះ​វិញ​ក៏​ស្រាប់តែ មាន​បងប្អូន​ទូរស័ព្ទ​ប្រាប់​ថា ម្តាយ​របស់​ខ្លួន​ចាន​ចងក​សម្លាប់​ខ្លួន​ហើយ​ថា គាត់​ពុំបាន​ដឹង​ពី​មូលហេតុ​អ្វី​នោះ​ទេ។

សមត្ថកិច្ច​បាន​និយាយ​ថា ករណីនេះ​សាកសព​ជន​រង​គ្រោះ​ពិតជា​ស្លាប់​ដោយសារ​ករណី​ចងក​សម្លាប់​ខ្លួនឯង​ពិតមែន ដោយ​ប្រើ​ក្រមា ចងភ្ជាប់​បង្កាន់​ជណ្តើរ​លោត​ទម្លាក់​ខ្លួន ប៉ុន្តែ​បាន​ប្រគល់​សាកសព​ទៅ អោយ​កូនចៅ​យក​ទៅ​ធ្វើបុណ្យ​តាម​ប្រពៃណី៕