ភ្នាក់ងារ​Jorge Mendes ​៖ ​កីឡាករ​Ronaldo​នឹង​អាច​លេង​បាន​យ៉ាង​ហោច​១០​ឆ្នាំ​ទៀត

ថ្ងៃ សៅរ៍ ទី24 មករា ឆ្នាំ2015 ម៉ោង17:38   ផ្នែក: ព័ត៌មានអន្តរជាតិ​ទូទៅ    ដោយ: ហង្សទេព​

M24-01-15-z4-full

យោង​តាម​សម្តី​របស់​ភ្នាក់ងារ​ Jorge Mendes បាន​ឲ្យ​ដឹង​ថា តារា​ស៊ូ​ពើ​ស្តា ​Cristiano Ronaldo​នឹង​អាច​លេង​បាន​រយៈពេល​១០​ឆ្នាំ​ទៀត ដូច្នេះ​ហើយ​ក្លិប​Real Madrid​មិន​ត្រូវ​មើល​រំលង​រឿង​មួយ​នេះ​ជាដាច់ខាត។

សូមបញ្ជាក់ថា ប្រធាន​ក្រុម​ជម្រើសជាតិ​ព័រ​ទុយ​ហ្គា​ល់​ម្នាក់នេះ ទើបតែ​បាន​ឈ្នះ​ពានរង្វាន់​បាល់​មាស​ជា​លើក​ទី​៣​របស់គាត់​កាលពីដើម​ខែមករា​នេះ និង​ជា​ពានរង្វាន់​លើក​ទី​២ ដែល​គាត់​បានឈ្នះ​អំឡុងពេល​លេង​នៅក្នុង​ប្រទេស​អេ​ស្ប៉ា​ញ បន្ទាប់ពី​មាន​រដូវ​កាល​បាល់ទាត់​ដ៏​អស្ចារ្យ​ជាមួយ​ក្លិប Real Madrid​ជា​កន្លែង​ដែល​ពួកគេ​បាន​លើក​ពានរង្វាន់​បាល់ទាត់ Uefa Champions League ហើយ​មាន​សេចក្តីរាយការណ៍​ថា លោក​អាច​នឹង​ផ្ទេរ​ទៅលេង​ជាមួយ​ក្លិប​នៅក្នុង​ប្រទេស​ប្រេ​ស៊ី​ល មុនពេល​ដែល​លោក​បញ្ចប់​អាជីព​បាល់ទាត់។

ទោះបីជា​យ៉ាងណាក៏ដោយ លោក Mendes ដែលជា​ភ្នាក់ងារ​របស់​គាត់​នោះ មាន​ជំនឿ​ចិត្ត​ណាស់​ថា តារា​បាល់ទាត់​ម្នាក់​នេះ នឹង​បញ្ចប់​អាជីព​របស់​គាត់​ជាមួយ​ក្លិប​យក្ស​អេ​ស្ប៉ា​ញ​នេះ​តែម្តង ហើយ​​​​លោក​ក៏មាន​សុទិដ្ឋិនិយម​ណាស់​ដែរ​ថា គាត់​នៅសល់​រយៈពេល​១​ទសវត្សរ៍​មុននឹង​បញ្ចប់​អាជីព​បាល់ទាត់​ដ៏​ត្រចះត្រចង់​របស់គាត់​មួយ​នេះ។

លោក Mendes បាន​និយាយ​ប្រាប់​កាសែត Marca ថាលោក​ច្បាស់​ណាស់ ថា​មនុស្ស​របស់លោក​ម្នាក់នេះ នឹង​ប្រកាស​ចូលនិវត្តន៍​ពី​កីឡាករ​បាល់ទាត់​អាជីព នៅពេលដែល​គាត់​មាន​អាយុ​៣៨​ឬ​៣៩​ឆ្នាំ ដោយសារតែ​គាត់​នៅសល់​ពេលវេលា​ច្រើន​ទៀត​ត្រូវ​សម្រេច​ក្តី​ប្រាថ្នា​របស់គាត់។ អ្នក​រាល់គ្នា​បានដឹង​ច្បាស់​ហើយ​ថា គាត់​គឺជា​កីឡាករ​គំរូ​ម្នាក់ ដែល​មនុស្ស​ពិភពលោក​ទទួលស្គាល់ថា ជា​កីឡាករ​ម្នាក់​ដែលមាន​សមត្ថភាព​បាល់​ទាត់​បាន​អស្ចារ្យ​បំផុត៕