សេអ៊ូល ៖ កាលពីថ្ងៃច័ន្ទដើមសប្ដាហ៍នេះប្រទេសកូរ៉េខាងត្បូងបានរៀបចំពិធី«ប្រឆាំងនឹងភាពនៅលីវ» ចំថ្ងៃបុណ្យណូអែលដែលប្រកាសរៀបចំតាមបណ្តាញទំនាក់ទំនងសង្គមហ្វេបុក ហើយបានធ្វើឲ្យបុរសៗចូលរួមយ៉ាងច្រើនភ្លូកទឹកភ្លូកដី ខណៈពេលនារីត្រូវបានគេមើលឃើញថាចូលរួមតិចតូចតែប៉ុណ្ណោះ។
ព្រឹត្តិការណ៍គ្រោងរៀបចំកាលពីខែមុន បន្ទាប់ពីបុរសវ័យក្មេងពីរនាក់មានគំនិតបណ្តែតតាមប្រព័ន្ធហ្វេបុក ហើយក៏ស្រាប់តែមានអ្នកប្តេជ្ញាចិត្តចូលរួមក្នុងព្រឹត្តិការណ៍យ៉ាងច្រើនរហូតដល់៣៦០០០នាក់ឯណោះ។ ប៉ុន្តែក្នុងចំណោមពួកគេទាំងអស់នោះភាគច្រើនជាបុរសដែលមានអាយុចាប់ពី២០ទៅ៣០ឆ្នាំ។ ផ្ទុយទៅវិញនារីភាគច្រើនមិនសូវជាចូលរួមជាមួយនឹងព្រឹត្តិការណ៍នេះឡើយ ហើយពួកគេភាគច្រើនជាអ្នកឈរមើលទៅវិញ។
មន្ត្រីសមត្ថកិច្ចម្នាក់បានប្រាប់សារព័ត៌មាន AFPថា ៖«ភាគច្រើននៃអ្នកចូលរួមសុទ្ធតែបុរសក្មេងៗ....ហើយពួកគេចូលរួមយ៉ាងច្រើនភ្លូកទឹកភ្លូកដីតែម្តង។ អ្នករូមែនទិកដែលក្លាហានចូលរួមខណៈពេលសីតុណ្ហភាពត្រជាក់ក្រោម១០អង្សាសេនៅក្នុងបរិវេណឧទ្យានទីក្រុងសេអ៊ូល។ព្រឹត្តិការណ៍នេះបានប្រព្រឹត្តទៅរយៈពេលពីរម៉ោង។
បុរសស្លៀកពាក់ឈុតពណ៌ស និងនារីស្លៀកពាក់ឈុតពណ៌ក្រហមនៅពេលពួកគេបានជួបជុំគ្នាឧទ្យានទីក្រុងសេអ៊ូល ក្នុងខណ្ឌហិរញ្ញវត្ថុរបស់ប្រទេសនេះគឺ Yeouido។ អ្នកចូលរួមត្រូវបានគេបែងចែកជាពីរក្រុមដោយឈរទល់មុខគ្នាចំងាយបីទៅបួនម៉ែត្រដើម្បីរង់ចាំរហូតដល់ម៉ោង៣រសៀល បន្ទាប់មកពួកគេបាននាំគ្នាដើរឆ្ពោះទៅមុខដើម្បីស្វែងរកចាប់ដៃគូគ្នារវាងប្រុសនិងស្រី។
ប៉ុន្តែព្រឹត្តិការណ៍នេះវាហាក់ដូចជាមិនសូវមានអធិកអធមប៉ុន្មានទេនៅពេលពួកគេនាំគ្នាដើរឆ្ពោះទៅរកចាប់ដៃគូគ្នានោះ ពីព្រោះភាគច្រើនជាបុរសដូចគ្នាដែលធ្វើឲ្យពួកគេពិបាកស្វែងរកដៃគូជានារីណាស់។
យុវជនម្នាក់ឈ្មោះ គីម ស៊ុងសិក អាយុ២៣ឆ្នាំជានិស្សិតមហាវិទ្យាល័យបានរៀបរាប់ពីព្រឹត្តិការណ៍នេះថា ៖«ឯណាទៅស្រីៗ? ខ្ញុំសំឡឹងស្វែងរកស្រីអត់ឃើញមានសោះ។ ខ្ញុំមានអារម្មណ៍ថា មិនស្រួលចិត្តឡើយ»។
ស្របពេលអ្នកចូលរួមម្នាក់ទៀតមិនបានបញ្ចេញឈ្មោះបាននិយាយថា ៖«នេះពិតជាអាក្រក់មែន...បើខ្ញុំដឹងថា សុទ្ធតែបុរសៗអីចឹង ខ្ញុំនឹងមិនមកចូលរួមទេ។ ខ្ញុំជាប់គាំងដោយសារតែបុរសដូចគ្នា»។ គាត់និយាយដោយយោងទៅលើអាណត្តិសេវាកម្មយោធាពីរឆ្នាំសុទ្ធតែបុរសកូរ៉េខាងត្បូងទាំងអស់ថា ៖«វាដូចជាអ្វីចម្លែកម្យ៉ាង ពីព្រោះអ្នកចូលរួមភ្លូកទឹកភ្លូកដីសុទ្ធតែបុរសៗដែលសង្ឃឹមថា អាចស្វែងរកដៃគូបាន ប៉ុន្តែអត់មាននារីទៅវិញ។ គួរឲ្យចង់សើចមែន! ពីព្រោះធំក្លិនសុទ្ធតែបុរសដូចគ្នា។ ខ្ញុំមានអារម្មណ៍ថា ដូចដែលខ្ញុំនៅក្នុងហ្វូងយោធាទៀតហើយ»។
ព្រឹត្តិការណ៍ស្រដៀងគ្នានេះដែរនៅតាមទីក្រុងផ្សេងទៀតក៏សុទ្ធតែបុរសៗដែរចូលក្នុងព្រឹត្តិការណ៍ពាក់ព័ន្ធនឹងការស្វែងរកដៃគូ។ នេះបើតាមបណ្តាញសារព័ត៌មានបានចេញផ្សាយ។
ប្រទេសកូរ៉េខាងត្បូងមានប្រជាជនប្រមាណ៥០លាននាក់ដែលជាប្រទេសមួយប្រើបណ្តាញទំនាក់ទំនងសង្គមច្រើនជាងគេបំផុតនៅលើពិភពលោក ខណៈពេលប្រជាជនប្រមាណ៣១លាននាក់មានទូរស័ព្ទស្មាតហ្វូនប្រើ ហើយប្រជាជនជិត២០លាន់ប្រើបណ្តាញទំនាក់ទំនងសង្គមដូចជាហ្វេបុកឬទ្វីធឺ ប៉ុន្តែពួកគេជាពិសេសបុរសៗពិបាកក្នុងការស្វែងដៃគូណាស់៕
វេហា
