កំពង់ចាម ៖ មានលោកតាជើងខ្លាំង២នាក់ ម្នាក់ឈ្មោះ តាព្រាហ្ម និងលោកតាម្នាក់ទៀតឈ្មោះ តាជក់ លោកតាទាំង២នាក់សុទ្ធតែមានវិជ្ជាគុណដ៏ខ្លាំងពូកែ អាចការពារទឹកដីនៅតំបន់នោះ បឹងក្រំ ឬ ត្រពាំងក្រំ ស្ថិតក្នុងភូមិសាទុំ ឃុំជាំក្រវៀន ស្រុកមេមត់ ខេត្តកំពង់ចាម ដោយមិនឲ្យមានសត្រូវចូលមកយាយីធ្វើបាបប្រជានុរាស្ត្រក្នុងតំបន់នោះបានឡើយ ហើយលោកតាទាំង២នាក់បានលួចចាប់ចិត្តស្រឡាញ់នារីម្នាក់ឈ្មោះ នាងឡឺម ដែលមានរូបឆោមលោមពណ៌ស្រស់សោភា ស្អាតដាច់នារីដទៃនៅក្នុងតំបន់នោះ។
លោកតាទាំង២នាក់តែងតែមានមហិច្ឆតា ចង់បាន នាងឡឺម មកធ្វើជាភរិយារៀងៗខ្លួន ចាប់ពីនោះមកលោកតាទាំង២តែងតែ បោះពាក្យសំដី មិនសមរម្យដាក់គ្នាទៅវិញទៅមកឈានដល់ប្រយុទ្ធជារឿយៗ នៅថ្ងៃមួយនោះលោកតាទាំង២ ស្រវឹងស្រា ហើយបានប្រយុទ្ធគ្នា យកឈ្នះចាញ់ ស្លាប់រស់ពេញមួយថ្ងៃ ប្រដាប់ដោយអាវុធដាវ ទង្គិចគ្នាលាន់ឆឺងៗ លាយឡំដោយផ្កាភ្លើងព្រាកៗ ទីបំផុត ក្បាលលោកតាជើងខ្លាំងទាំង២នាក់ត្រូវដាច់ធ្លាក់ពីលើស្មាដូចៗគ្នា ស្លាប់តៃហោងទាំង២នាក់ នៅចំណុចខាងលិចចម្ងាយពី ត្រពាំងក្រំប្រហែល៥០០ម៉ែត្រ។
បើតាមការឲ្យដឹងពីលោកតាព្រឹទ្ធាចារ្យ ឯម ម៉ើ ភេទប្រុស អាយុ៧៤ឆ្នាំ រស់នៅភូមិសាទុំ ឃុំជាំក្រវៀនស្រុកមេមត់ ខេត្តកំពង់ចាម បានឲ្យដឹងថា គាត់បានឮ ចាស់ៗ ពីដើមបានដំណាលតៗគ្នាប្រាប់គាត់ថា លោកតាព្រាហ្ម និង លោកតាជក់ នេះ មានមហិទ្ធិឫទ្ធិខ្លាំងពូកែណាស់ក្នុងតំបន់នេះ គ្មានជើងខ្លាំងឯណាមកយកឈ្នះ ពួកគាត់ទាំង២នាក់បានឡើយ ហើយគាត់ទាំង២នាក់ បានស្រឡាញ់នារីម្នាក់ឈ្មោះ នាងឡឺម ដែលមានសម្រស់ស្អាតដាច់នារីក្នុងតំបន់នេះ ហើយសម្រស់នាងស្អាតក៏មិនចាញ់នាងទាវនៅស្រុកត្បូងឃ្មុំដែរ ម្តាយរបស់នាងឈ្មោះ ដូនសូត រីឯជីដូនរបស់នាងឈ្មោះ ដូនយាយ មានមុខរបរជាអ្នកបិតស្រា។ ថ្ងៃមួយនោះលោកតាទាំង២នាក់ បានទៅទិញស្រាយកមកផឹក រួចបើកការប្រយុទ្ធគ្នា ដើម្បីដណ្តើមយក នាងឡឺម មកធ្វើជាភរិយារៀងៗខ្លួន ឆាកប្រយុទ្ធគ្នាយ៉ាងក្តៅគគុកនេះ ប្រដាប់ដោយអាវុធដាវមាន១ហ៊ុន ប្រវែងជាង២ម៉ែត្រ ដងដាវទំហំមួយក្តាប់តឹងប្រវែង២តឹក និងញែងដាវក៏មានប្រវែង២តឹកដែរ(សម្រាប់ទប់ផ្លែដាវ)។ លទ្ធផលប្រយុទ្ធផ្តើមចេញពីសង្គ្រាមស្នេហារបស់លោកតាទាំង២នាក់ បានបន្សល់ទុកនៅ រាងកាយ ក្បាល ដៃ ជើង ដាច់ចេញពីខ្លួនដូចៗគ្នា ហើយឈាមអមតៈ របស់លោកតាទាំង២នាក់មានពណ៌ក្រហមឆ្អិនឆ្អៅ នៅចំណុចខាងលើ សព្វថ្ងៃបានក្លាយជាថ្ម ហើយនៅរដូវវស្សា ចំណុចនេះត្រូវលេចទឹក ទឹកឡើងពណ៌ក្រហម មានក្លិនឆ្អាបដូចឈាមស្រស់ៗ ថ្មីៗ ពិតៗ ក្លិនឆ្អាបនេះយើងមិនអាចបរិភោគបានឡើយ មានទំហំប្រហែល៥០ម៉ែត្របួនជ្រុង។
ដោយឡែកចំពោះ ដូន សូត ដែលជាស្ត្រីមេម៉ាយ បានដឹងថា លោកតាទាំង២នាក់ ច្បាំងគ្នាដណ្តើមយកកូនក្រមុំគាត់ នាងឡឺម គាត់មានការភិតភ័យយ៉ាងខ្លាំង ហើយបាននាំកូនក្រមុំគាត់ទៅពួនក្នុងវត្តទួលវិហារ បន្ទាប់មកវត្តនេះត្រូវស្រុតដោយនាំទាំង ម្តាយកូន រហូតសព្វថ្ងៃ បច្ចុប្បន្នក៏ក្លាយជាថ្មដែរ ស្ថិតនៅខាងត្បូងទីលានឈាម អមតៈ។ ផ្ទះរបស់ ដូនយាយ មានឡចំហុយស្រា ស្ថិតនៅខាងត្បូងវត្តទួលវិហារ បច្ចុប្បន្នក៏ក្លាយជាថ្មដែរ។
លុះចំណេរចេរកាលក្រោយមក មានចៅក្រម អស់លោក នាម៉ឺន សព្វមុខមន្ត្រី បានកោះហៅអស់ប្រជានុរាស្ត្រនៅក្នុងតំបន់នេះមកធ្វើពិធីរំលឹកគុណ ដល់លោកតាព្រាហ្ម និង លោកតាជក់។ មានរៀបចំកាប់ជ្រូក តែព្រលះបានតែស្មាមុខសងខាង និងគូទក្រោយខាងឆ្វេងម្ខាង ស្រាប់តែជ្រូកនោះក៏ក្លាយជាថ្មរូបទៅ។
ជ្រូកថ្មនេះទៀតសោត នៅរដូវវស្សា ទឹកមិនដែលលេចខ្នងជ្រូកនេះទេ ខ្នងជ្រូកមានកំពស់ប្រហែល៧តឹក ទឹកលេចជុំវិញជ្រូកកំពស់១ម៉ែត្រក៏មិនលេចជ្រូកថ្មសក្ដិសិទ្ធិនេះដែរ បើទឹកលេចជ្រូកជាប្រផ្នូលដល់ស្រុកទេស។ ពេលកន្លង ក្មេងកូនអ្នកភូមិៗទៅឃ្វាលគោ បាត់គោតែងយកស្ករគ្រាប់ទៅបន់រកឃើញគោវិញដូចបំណង៕
សាន វិឡែម
