ញូវដេហី ៖ កូនស្រីរបស់វិរតន្ត្រីករស៊ីតា(Sitar)ឥណ្ឌាដ៏ល្បីល្បាញ Ravi Shankar បាននិយាយកាលពីថ្ងៃព្រហស្បតិ៍តាមវីដេអូចេញផ្សាយមួយសម្រាប់យុទ្ធនាការផ្សព្វផ្សាយសិទ្ធិនារីជាសកលថា នាងត្រូវបានគេរំលោភបំពានផ្លូវភេទតាំងពីកុមារភាព។
នាង Anoushka Shankar ដែលមានកេរ្តិ៍ល្បីល្បាញពីការលេងឧបករណ៍តន្ត្រីស៊ីតាដូចឪពុករបស់នាងដែរនោះបាននិយាយថា នាងបានសម្រេចចិត្តលាតត្រដាងជាសាធារណៈដើម្បីគាំទ្រដល់យុទ្ធនាការឃោសនា«លើកកម្ពស់មួយពាន់លានប្រឆាំងនឹងអំពើហិង្សា និងរំលោភបំពានផ្លូវភេទលើស្ត្រីភេទ។
នាងបានបង្ហាញសាររបស់នាងទៅកាន់និស្សិតពេទ្យឥណ្ឌាម្នាក់ដែលត្រូវបានចាប់រំលោភនៅលើរថយន្តក្រុងមួយដោយក្មេងទំនើងស្រវឹងស្រា៦នាក់កាលពីថ្ងៃទី១៦ ខែធ្នូ នៅទីក្រុងញូវដេហី ហើយបន្ទាប់ក៏បាត់បង់ជីវិតនៅក្នុងមន្ទីរពេទ្យដោយសាររបួសធ្ងន់ធ្ងរពេក។
ឧក្រិដ្ឋនេះបានធ្វើឲ្យមានការតវ៉ាដោយកំហឹងស្ទើរតែជុំវិញប្រទេសឥណ្ឌា។ នាង Shankar បាននិយាយថា ៖«កាលខ្ញុំនៅពីក្មេង ខ្ញុំទទួលរងរំលោភបំពានផ្លូវភេទ និងផ្លូវចិត្តជាច្រើនឆ្នាំដែលស្ថិតនៅក្នុងដៃបុរសម្នាក់ដែលឪពុកម្តាយទុកចិត្តទាំងស្រុង»។ សារវីដេអូរបស់នាងនេះបានចេញនៅតាមគេហទំព័រយូធូបពីផ្ទះរបស់នាងនៅទីក្រុងឡុងដ៍ ប្រទេសអង់គ្លេស។
នាងបន្តទៀតថា ៖«ខ្ញុំធំដឹងក្តីដូចស្ត្រីដទៃទៀតដែរ តែខ្ញុំរងទុក្ខវេទនាផ្លូវចិត្តខ្លាំង ហើយស្ទើរតែគ្មានពាក្យអ្វីហាស្តីបានឡើយ ហើយខ្ញុំមិនថាត្រូវធ្វើយ៉ាងម៉េចនោះទេក្នុងការរស់នៅក្នុងស្ថានភាពបែបនេះ តែខ្ញុំបានអត់ធ្មត់សង្កត់ចិត្តរស់នៅ និងដើម្បីជួយកែប្រែសង្គមខ្មៅងងឹតនេះ»។
កំពូលតន្ត្រីការិនីវ័យក្មេងដែលកើតនៅសហរដ្ឋអាមេរិករូបនេះបាននិយាយទៀតថា ៖«អ្វីៗគ្រប់គ្រាន់ហើយ គ្រប់គ្រាន់ហើយ….ខ្ញុំកំពុងតែពង្រឹងស្មារតីជួយលើកកម្ពស់ និងលើកទឹកចិត្តដល់ស្ត្រីទូទៅ និងស្ត្រីដែលរងទុក្ខដូចខ្ញុំ»។
យុទ្ធនាការឃោសនាលើកកម្ពស់សិទ្ធិនារីដែលដាក់ប្រធានបទថា «លើកកម្ពស់មួយពាន់លានដង»ត្រូវបានគេធ្វើឡើងកាលពីម្សិលមិញចំពេលទិវានៃក្តីស្រឡាញ់ដែលត្រូវបានគេធ្វើឡើងទូទាំងរាជធានីប្រទេសឥណ្ឌាដើម្បីជួយដល់ស្ត្រូ។ នេះបើតាមការឲ្យដឹងពីនាង Kamla Bhasin សកម្មជនដើម្បីស្ត្រីដែលដឹកនាំយុទ្ធនាការនេះនៅអាស៊ីភាគខាងត្បូង។
នាងនិយាយប្រាប់ AFP ថា ៖«ចាប់ពីថ្ងៃទី១០ ខែកុម្ភៈមកដែលកម្មវិធីយើងបានរៀបចំធ្វើឡើងនៅសាកលវិទ្យាល័យ ហើយខ្ញុំជាមួយស្ត្រីអ្នកបើកឡានឈ្នួល៦នាក់ផ្សេងទៀតបានផ្សព្វផ្សាយពាក្យសមភាពនេះ ពីព្រោះកាលពីម្សិលមិញជាទិវានៃក្តីស្រឡាញ់»។
នាងបន្តទៀតថា សកម្មជនដើម្បីស្ត្រីគួរនាំគ្នាលើឆាក តាមផ្លូវ អុចទៀន និងនាំគ្នាស្រែកពាក្យស្លោកអំពីការប្រឆាំងនឹងហិង្សា។
នៅទីក្រុងម៊ុមប៊ៃក៏មានរៀបចំពិធីនេះជាច្រើនផងដែរដែលត្រូវបានគេឃើញថាមានការរាំនៅមាត់ទន្លេស វាយស្គរពេលថ្ងៃរៀបលិច និងការបង្ហាញពីសាមគ្គីភាពក្នុងការជួយដល់ស្ត្រី និងប្រឆាំងអំពើហិង្សាគ្រប់រូបភាពលើស្ត្រីភេទ។
ប៉ូលិសទីក្រុងញូវដេហី៥នាក់ត្រូវបានចោទប្រកាន់ពាក់ព័ន្ធនឹងការរំលោភផ្លូវភេទ និងឃាតកម្ម។ ជនសង្ស័យទី៦គឺជាប់ពាក់ព័ន្ធនឹងអនីតិជនដែលកំពុងតែបើកសវនាការកាត់ទោសពីការរំលោភលើអនីតិជន៕
វេហា
