ហុងកុង ៖ បណ្តាញសារព័ត៌មានហុងកុងបានចេញផ្សាយថា តារាភាពយន្តចិនហុងកុងល្បីឈ្មោះ Raymond Lam បានសារភាពកាលពីពុធសប្ដាហ៍នេះថា លោកបានកំពុងតែទំនាក់ទំនងមនោសញ្ចេតនាស្នេហាជាមួយតារាភាពយន្តនិងម៉ូដែលវ័យ១៩ឆ្នាំ មួយរយៈពេលមកហើយ។
តារាភាពយន្តចិនហុងរូបដែលមានអាយុ៣៣ឆ្នាំរូបនេះបានឆ្លើយតបនឹងសំនួរនៅពេលគេសួរថា ហេតុអ្វីបានជាលោកលាក់លៀមរឿងនេះពេលគេសម្ភាសន៍កន្លងថា វាជារឿងឯកជន ហើយលោកក៏មិនបាននិយាយអ្វីពាក់ព័ន្ធនឹងការងារដែរ។
លោកបានលើកឡើងដោយសង្កត់ធ្ងន់ថា ពេលនេះលោកសម្រេចចិត្តបើកចំហជាសាធារណៈអំពីទំនាក់ទំនងមនោសញ្ចេតនាស្នេហារបស់គាត់ជាមួយសង្សារវ័យក្មេងដែលបើតាមគេដឹងគឺនាង Karena Ng ដែលជាតារាសម្តែង និងម៉ូដែលវ័យក្មេង ពីព្រោះលោកចង់ឲ្យគេដឹងថា លោកជាបុរសដើមទ្រូងប្រាំហត្ថដែលហ៊ានទទួលខុសត្រូវចំពោះស្នេហា និងការពារកិត្តិយសនាង Ng។
លោកនិយាយថា ៖«ជាយូរមកហើយ ខ្ញុំមិនដែលបកស្រាយឬអត្ថាធិប្បាយពីរឿងអ្វីក្រៅពីការងារនោះទេ ប៉ុន្តែព័ត៌មានចេញផ្សាយថ្មីៗនេះបានជះឥទ្ធិពលលើមនុស្សដែលខ្ញុំស្រឡាញ់ ក្នុងនោះមានទាំងសមាជិកគ្រួសាររបស់ខ្ញុំ សមាជិកគ្រួសាររបស់សង្សារខ្ញុំ និងជាពិសេសលើរូបនាងផ្ទាល់តែម្តង»។
លោកប្រាប់អ្នកសារព័ត៌មាននៅឯកម្មវិធីតន្ត្រីទូរទស្សន៍មួយថា ៖«ខ្ញុំមិនត្រូវការក្មេងល្អទេ តែជាមនុស្សម្នាក់ដែលយកចិត្តទុកដាក់ចំពោះខ្ញុំ ហើយនឹងមិនធ្វើឲ្យអ្នករាល់គ្នាមានការយល់ច្រឡំ»។
លោក Lam ក៏ធ្លាប់បានបដិសេធចំពោះព័ត៌មានទាំងឡាយដែលបានចេញផ្សាយថា លោកបានទៅជួបជាមួយឪពុកម្តាយរបស់នាង ប៉ុន្តែលោកបានសារភាពថា នាងបានជួបជាមួយឪពុកម្តាយរបស់លោករួចហើយៗមិនបានគិតគូររឿងរៀបការទេ។ លោកថា ៖«ខ្ញុំមិនបានទៅជួបឪពុកម្តាយក្រុមគ្រួសាររបស់នាងទេ ប៉ុន្តែនាងបានជួបឪពុកម្តាយរបស់ខ្ញុំ»។
ជាមួយគ្នាតារាភាពយន្តហុងកុងវ័យ៣៣ឆ្នាំរូបនេះក៏បានខឹងសម្បានឹងសារព័ត៌មានដែលបានលើកឡើងថា លោកបានជួលអាផាតមេនរស់នៅជាមួយគ្នា។ លោកថា៖«ខ្ញុំមិនបានទៅជួលផ្ទះរស់នៅជាមួយនាងឯណា ហើយតើនរណាឃើញខ្ញុំនៅផ្ទះជួលជាមួយនាង យើងគ្រាន់តែជាគូស្នេហ៍ធម្មតា ហើយក៏មិនមានអ្វីហួសពីព្រំដែនឡើយ»៕
វេហា
