កាលពីថ្ងៃសុក្រកោះអាជ្ញាធរកោះ Solomonsដ៏ល្បីល្បាញបានអំពាវនាវឲ្យប្រជាពលរដ្ឋឈប់នាំគ្នាសម្លាប់សត្វផ្សោតដែលការអនុវត្តតាមបែបប្រពៃណីរបស់ពួកគេ ពីព្រោះសកម្មភាពទាំងនេះកំពុងតែធ្វើឲ្យវិនាសឧស្សាហកម្មទេសចរណ៍របស់ប្រទេសបាស៊ីហ្វិកមួយនេះ។
អ្នកភូមិ Fanalei បានសម្លាប់ត្រីផ្សោតប្រហែលជា៧៥០ក្បាលកាលពីខែមុនដោយគេលើកឡើងថាពួកគេបានធ្វើសកម្មភាព បន្ទាប់ក្រុមអ្នកអភិរក្ស Earth Island Institute ដែលមានមូលដ្ឋាននៅអាមេរិកបានបរាជ័យក្នុងការផ្តល់មូលនិធិដែលពួកគេបានសន្យាក្រោមកិច្ចព្រមព្រៀងឆ្នាំ២០១០ដើម្បីបញ្ឈប់ការសម្លាប់។
លោក Samuel Manetoali រដ្ឋមន្ត្រីក្រសួងទេសចរណ៍បដិសេធធ្វើអត្ថាធិប្បាយអំពីជំលោះរវាងអ្នកភូមិ និងក្រុមអ្នកអភិរក្ស ប៉ុន្តែលោកចង់ឲ្យអ្នកភូមិបញ្ឈប់សកម្មភាពសម្លាប់ត្រីផ្សោតទាំងនោះ ពីព្រោះពួកគេកំពុងតែធ្វើឲ្យកិត្តិនាមជាលក្ខណៈអន្តរជាតិរបស់កោះ Solomons ធ្លាក់ចុះ។
លោកបានប្រាប់សារព័ត៌មាន AFP ថា ៖«ទង្វើនេះធ្វើឲ្យលេចចេញព័ត៌មានមិនល្អទៅកាន់ក្រៅប្រទេស ដូច្នេះវានឹងជះឥទ្ធិពលអវិជ្ជមានដល់ទីផ្សារទេសចរណ៍របស់យើង ជាពិសេសប្រទេសអូស្ត្រាលីនិងញូវសាឡែន»។ លោកបន្ថែមថា លោកគ្រោងធ្វើដំណើរទៅកាន់ភូមិ Fanalei ដើម្បីពិភាក្សាជាមួយប្រធានក្រុមជនជាតិភាគតិចលើបញ្ហានេះ។
ការប្រមាញ់ត្រីផ្សោតគឺជាសកម្មភាពប្រពៃណីនៅតំបន់កោះ Solomons ដែលធ្មេញរបស់សត្វផ្សោតត្រូវបានគេប្រើជាយូរអង្វែងជាទម្រង់រូបិយប័ណ្ណ។ ជាងនេះទៅទៀតប៉ុន្មានឆ្នាំចុងក្រោយនេះ អ្នកភូមិបានសម្លាប់សត្វផ្សោត និងនាំចេញតាមផ្លូវសមុទ្រទៅកាន់មណ្ឌលកម្សាន្តនានា។
លោក Manetoali បាននិយាយថា ៖«វាជាបញ្ហារសើបខ្លាំងណាស់ ពីព្រោះអ្នកស្រុកទាំងនោះពឹងផ្អែកទៅលើការប្រតិបត្តិតាមប្រពៃណីរបស់ពួកគេ ហើយយើងចង់រក្សាធ្វើទេសចរណ៍មានកំណើត ព្រោះឥឡូវជាសម័យភាវូបនីយកម្ម។ ប៉ុន្តែអ្វីៗយើងត្រូវពិភាក្សាគ្នា និងយល់ស្របតាមសកម្មភាពឈ្នះៗដើម្បីប្រទេសជាតិទាំងអស់គ្នា ជាពិសេសក្តីបារម្ភរបស់សហគមន៍»។
លោកបន្តថា ការសម្លាប់សត្វផ្សោតគឺហាក់ដូចជាការបំផ្លាញឆ្អឹងខ្នងដ៏សំខាន់នៃវិស័យទេសចរណ៍ ពីព្រោះកាលពីខែកញ្ញាកន្លងទៅនេះទទួលបានភ្ញៀវទេសចរណ៍អន្តរជាតិយ៉ាងច្រើនបំផុតស្របពេលដែលព្រះអង្គម្ចាស់ វីលៀម និងមហេសីព្រះនាងខេតរបស់ចក្រភពអង់គ្លេសក៏បានទៅក្រសាលនៅកោះ Solomonsដែរ។
ក្រុមអ្នកអភិរក្ស The Earth Island Institute មិនបានបញ្ចប់កិច្ចព្រមព្រៀងរបស់ពួកគេជាមួយអ្នកភូមិជនជាតិភាគតិចនោះទេ ហើយពួកគេលើកឡើងថា ការសម្លាប់សត្វផ្សោតដូចនេះជារឿងវិនាសហិនហោច ហើយបណ្តាលមកពីភាពរឹងទទឹងនៃមេកុលសម្ព័ន្ធទាំងនោះ៕
វេហា
