សេអ៊ូល ៖ បណ្តាញសារព័ត៌មានកូរ៉េខាងត្បូងបានចេញផ្សាយថា តារាចម្រៀងស្រីប៉ុបនាង ស៊ុនយីដែលជាប្រធានក្រុមតារាចម្រៀងស្រីល្បីឈ្មោះ Wonder Girls ត្រូវបានទម្លាយឲ្យដឹងកាលពីថ្ងៃសៅរ៍កំឡុងពេលសន្និសីទសារព័ត៌មានស្តីពីអាពាហ៍ពិពាហ៍របស់នាងថា នៅនឹងនៅតែបន្តអាជីពចម្រៀងរបស់ដដែល បន្ទាប់ពីបានរៀបការជាអនាគតប្តីរបស់នាងសញ្ជាតអាមេរិកកាណាដារួច។
ប្រធានក្រុមវ័យ២៣ឆ្នាំនេះបានឲ្យដឹងថា នាងកំពុងតែទន្ទឹងរង់ចាំដំណឹងល្អគឺមានកូន ទោះជាយ៉ាងណានាងនិយាយថា ៖«ខ្ញុំមិនទាន់ចង់មានកូនភ្លាមៗនោះទេ»។
នៅឯសន្និសីទសារព័ត៌មានត្រូវបានអ្នកសារព័ត៌មានសួរបញ្ជាក់ពីអាជីពរបស់នាង ហើយនាងម៉ិន ស៊ុនយីបានឆ្លើយថា នៅពេលនេះខ្ញុំនឹងផ្តោតអារម្មណ៍ខ្លាំងលើក្រុមគ្រួសារ ប៉ុន្តែនាងក៏មិនបោះបង់ចោលអាជីពចម្រៀងដដែល។
នាងនិយាយថា ៖«ខ្ញុំមិនបោះបង់ចោលអាជីពចម្រៀងរបស់ខ្ញុំនោះទេ។ ពីព្រោះនេះជាអាជីពពេញចិត្តយូរណាស់មកហើយសម្រាប់ខ្ញុំ។ បើទោះជាខ្ញុំមិនប្រាកដប្រជានៅសម្តែងជាមួយក្រុមទៀត តែខ្ញុំអាចនឹងបន្តអាជីពរបស់ខ្ញុំនៅប្រទេសកាណាដានៅពេលខ្ញុំចេញទៅរស់នៅទីនោះជាមួយប្តីរបស់ខ្ញុំ»។ ទោះជាយ៉ាងណានាងបញ្ជាក់ថា នាងមិនទាន់ប្រាកដថាពេលណាអាចលេចមុខលើឆាកទៀតនោះទេ។
កាលពីសប្តាហ៍មុន ប្រធានក្រុមរូបនេះបានស្តាប់វិទ្យុបានតេទូរស័ព្ទទៅនាង Yeeun និង Yoobin ហើយបានបន្សល់ទុកនូវសារថ្លែងអំណរគុណដល់សមាជិករបស់នាង។ នាងបាននិយាយថា ៖«ឥឡូវនេះឈ្មោះ Wonder Girls និងអនាគត Wonder Girls យើងនៅតែនៅជាមួយគ្នាពោរពេញដោយអត្ថន័យ និងគ្មានថ្ងៃប្រេះស្រាំឡើយ។ សំឡាញ់ Yoobin សម្លាញ់Yeeun សំឡាញ់ Hyerim សំឡាញ់ Sohee ព្រមទាំងសំឡាញ់ Sunmi ខ្ញុំ អរគុណអ្នកទាំងអស់គ្នា។ យើងនៅជាមួយគ្នាទៀតនិងមិនមានប្រែប្រួលឡើយ។ សូម្បីតែនៅពេលខ្ញុំសម្រេចចិត្តរៀបការ និងកំពុងតែរៀបចំពិធីនេះ អ្នកទាំងអស់គ្នានៅតែគាំទ្រខ្ញុំ។ មិនថាមានអ្វីកើតឡើងទេ ខ្ញុំនៅតែមិនប្រែប្រួលឡើយចំពោះមិត្តភាពរបស់យើង»។
អាពាហ៍ពិពាហ៍របស់ប្រធានក្រុម Wonder Girls រូបនេះនឹងប្រារព្ធនៅសណ្ឋាគារ Lotte Hotel ក្នុងទីក្រុងសេអ៊ូល ដែលនឹងមានវត្តមានតារាល្បីៗនៅប្រទេសកូរ៉េ និងសាច់ញាតិទាំងសងខាងចូលរួមជាភ្ញៀវកិត្តិយស។ នៅពិធីនោះត្រូវបានគេឲ្យដឹងថាមានតារាឡើងច្រៀងជាកិត្តិយសដូចជាប្រធានក្រុមហ៊ុន JYP Entertainment លោក Park Jin Young សមាជិកក្រុម Wonder Girls លោក Jo Kwonជាដើម៕
វេហា
