ប៉ារីស ៖ តារាភាពយន្តហូលីវូដនាង Natalie Portman នឹងចាកចេញពីទីក្រុងញូវយ៉កសហរដ្ឋអាមេរិកទៅរស់នៅទីក្រុងប៉ារីសប្រទេសបារាំងជាមួយប្ដីសញ្ជាតិបារាំងរបស់នាងលោក Benjamnin Millepied បន្ទាប់ពីប្ដីរបស់នាងត្រូវបានតែងតាំងនាយកអូបេរ៉ានៅរាជធានីប៉ារីស។
លោកMillepied ជាអ្នករបាំអូបេរ៉ា និងនាដសាស្ត្រដ៏ល្បីល្បាញបំផុតដែលសម្តែងរួមជាមួយនាង Portman នៅក្រុងខ្សែភាពយន្ត "Black Swan" ត្រូវបានតែងតាំងជានាយកអូបេរ៉ា ជំនួសលោក Brigitte Lefevre កាលពីថ្ងៃព្រហស្បតិ៍។
ខាងអូបេរ៉ាបានឲ្យដឹងថា តារាសម្តែងអូបេរ៉ាអាយុ៣៥ឆ្នាំបានចាប់អាជីពរបស់គាត់នៅទីក្រុងញូវយ៉កជាកន្លែងដែលគាត់បានក្លាយជាអ្នករបាំអូបេរ៉ាដ៏ល្បីល្បាញក្នុងឆ្នាំ២០០២ ហើយគាត់នឹងចាប់បំពេញការងាររបស់គាត់នេះរហូតដល់ខែតុលា ឆ្នាំ២០១៤។
លោក Millepied បានរៀបការជាមួយនាង Portman នៅទីក្រុងខាលីហ្វញ៉ាកាលពីខែសីហា ឆ្នាំ២០១២ និងទទួលបានកូនប្រុសតូចម្នាក់ជាមួយនឹងតារាភាពយន្តស្រីដែលទទួលបានពានរង្វាន់អូស្ការម្នាក់នេះ។
លោកបាននិយាយថា ៖«វាមិនមានបញ្ហាស្មុគស្មាញខ្លាំងនោះទេ ដែលយើងទៅរស់នៅទីក្រុងបារីសនោះ។ ខ្ញុំនឹងទៅរស់នៅទីនោះជាមួយគ្រួសារ។ នេះជាជម្រើសសម្រាប់គ្រួសារខ្ញុំ។ វាជាឱកាសដ៏ល្អកម្រមានដែលបានទៅរស់នៅទីក្រុងប៉ារីស បន្ទាប់ពីបានរស់នៅទីក្រុងញូវយ៉ករយៈពេល២០ឆ្នាំហើយ។ យើងពិតជាទន្ទឹងរង់ចាំទទួលយកបទពិសោធន៍ជីវិតថ្មី និងមានផែនការរស់នៅកន្លែងណាមួយឲ្យបានឆាប់ ពីព្រោះខ្ញុំត្រូវការចំណាយពេលយូរនៅទីនោះ»។
លោកMillepied បាននិយាយថា ប្រពន្ធរបស់គាត់នាង Portman អាយុ៣១ឆ្នាំដែលជាដៃគូរស់នៅជាមួយគ្នាជិត៣ឆ្នាំ ហើយមិនមានបំណងបោះបង់ចោលអាជីពសម្តែងរបស់នាងនោះទេ។ នាងកំពុងតែពិចារណាទទួលយកការសម្តែងពីផលិតករភាពយន្តអឺរ៉ុប។ លោកថា៖«ការពិតគឺថា ប្រពន្ធខ្ញុំនឹងមិនបោះបង់ចោលគម្រោងសម្តែងរបស់គាត់ជាមួយផលិតករភាពយន្តនៅអឺរ៉ុបឡើយនៅពេលគាត់មករស់នៅជាមួយខ្ញុំនៅទីក្រុងប៉ារីស»។
តារាភាពយន្តនាង Portman បានចាប់ផ្តើមអាជីពសម្តែងដ៏ល្បីល្បាញតាំងពីទើបមានអាយុ១២ឆ្នាំនៅក្នុងរឿង Leon របស់ផលិតករភាពយន្តបារាំងលោក Luc Besson ដូច្នេះដោយសារតែអាជីពសម្តែងកំពុងតែដំណើរគម្រោងនាងនឹងមិនបាននៅជាប់លាប់ជាមួយប្ដីនៅបារីសឡើយ។ តារាស្រីម្នាក់នេះបានទៅសិក្សានៅប្រទេសបារាំងនៅសាលា Harvard។
នាងមានសញ្ជាតិអាមេរិកនិងអ៊ីស្រាអែល ហើយថ្មីៗនេះថានាងទទួលបានសញ្ជាតិបារាំងថែមទៀត បន្ទាប់ពីនាងទៅនៅប៉ារីសជាកន្លែងដែលនាងច្បាប់ដោយឯកជនដ៏តឹងរ៉ឹងចំពោះតារាសិល្បៈ។
លោកMillepied និងភរិយា Portman បានជួបគ្នាកាលពីឆ្នាំ២០១០នៅពេលពួកគេសម្តែងរឿងរួមគ្នាគឺ "Black Swan,"ដែលធ្វើឲ្យតារាស្រីម្នាក់នេះទទួលបានពានរង្វាន់អូស្ការតារាស្រីឆ្នើមប្រចាំឆ្នាំ។
កើតមកជាមួយម្តាយជាគ្រូបង្រៀនរបាំ លោកMillepiedបានធំដឹងក្តីឡើងនៅ Senegal និងបារាំងហើយបាននិយាយថា ជីវិតរបស់លោកគ្រប់ដណ្ដប់ដោយរបាំក្លាស៊ីក និងរបាំសេរីអាហ្វ្រិក ព្រមទាំងតន្ត្រីហ្សាក់ផងដែរ។ លោកធ្លាប់បានគម្រោងចំនួន២៥ខុសគ្នាពាក់ព័ន្ធនឹងអាជីពរបាំអូបេរ៉ារបស់គាត់។ កាលពីឆ្នាំ២០១១លោកបានចាប់ផ្តើមគម្រោងអូបេរ៉ាហៅថា LA Dance នៅទីក្រុងឡូស អេនជឺឡេស។ ចំណែករបាំអូបេរ៉ាប៉ារីសមានអ្នករបាំចំនួន១៥០នាក់គឺជារបាំបែបប្រពៃណីដ៏ល្បីល្បាញ និងធំជាគេបំផុតរបស់បារាំងនៅលើពិភពលោកនេះ៕
វេហា
