ឡូស អេនជឺឡេស ៖ ចៅក្រមសហរដ្ឋអាមេរិកបានបញ្ជាឲ្យផលិតករភាពយន្តលោក James Cameron ផ្តល់នូវសេចក្តីព្រាងអត្ថបទខ្សែភាពយន្តដ៏ល្បីរបស់គាត់គឺរឿង «អាវតាឬAvatar» កាលពីថ្ងៃពុធទៅមេធាវីរបស់គាត់ បន្ទាប់មានបុរសម្នាក់បានដាក់ពាក្យប្តឹងគាត់ពីបទលួចចម្លងសាច់រឿងរបស់គាត់។
បុរសឈ្មោះ Eric Ryder បានកំពុងតែស្វែងរកសំណងពីលោក Cameron និងក្រុមហ៊ុនផលិតកម្មរបស់គាត់ Lightorn Entertainment តាមការប្តឹងទៅលើខ្សែភាពយន្ត«អាវតា»ដែលទទួលបានពានរង្វាន់អូស្ការកាលពីឆ្នាំ២០០៩ ដោយបុរសរូបនេះបានអះអាងថា ខ្សែភាពយន្តរបស់លោក Cameron នេះគឺជាអត្ថបទសាច់រឿងរបស់គាត់ហៅថា K.R.Z.2068 ដែលគាត់បានសរសេរ។ គាត់បានដាក់ពាក្យបណ្តឹងកាលពីខែធ្នូ ឆ្នាំ២០១១ ដោយបានលើកឡើងថា គាត់បានចំណាយពេលពីរឆ្នាំដើម្បីបង្កើតរឿងនេះ។
កាលពីថ្ងៃពុធលោក Alan Rosenfield ចៅក្រមតុលាការជាន់ខ្ពស់ទីក្រុង ឡូស អេនជឺឡេស បានបញ្ជាឲ្យមេធាវីរបស់លោក Cameron ប្រមូលផ្តុំអត្ថបទសាច់រឿងឡើង។
លោកបាននិយាយថា ៖«យើងត្រូវតែមានការប្រុងប្រយ័ត្នអំពីគំនិត និងព័ត៌មា»។ ប៉ុន្តែលោកបដិសេធចំពោះការស្នើសុំរបស់មេធាវីរបស់លោក Ryder ដែលចង់ចូលមើលកិច្ចការផ្ទាល់ខ្លួនរបស់លោក Cameron និងលោក Jon Landau ជាអគ្គនាយកប្រតិបត្តិក្រុមហ៊ុន Lightstorm Entertainment Incតាមរយៈកុំព្យូទ័រ។
លោក K. Andrew Kent មេធាវីរបស់លោក Ryder បាននិយាយថា ក្រុមការងារច្បាប់ក៏នឹងចូលឆែកមើលកុំព្យូទ័រផ្ទាល់ខ្លួនដែលប្រើដោយលោក Cameron។
ខ្សែភាពយន្តខ្នាតធំរឿង «អាវតា»ជាប្រភេទខ្សែភាពយន្តបែបស្រ៊ីឌីដែលទទួលបានជោគជ័យខ្លាំងបំផុត ខណៈពេលដែលរឿងមួយនេះរកប្រាក់ចំណូលបានរហូតដល់២,៧ពានលានដុល្លារអាមេរិកជុំវិញពិភពលោក៕
វេហា
