តារាភាពយន្តជើងចាស់អាមេរិកដ៏ល្បីល្បាញលោក Jack Klugman ដែលមានភាពល្បីល្បាញខ្លាំងតាមរឿងភាគទូរទស្សន៍នាទសវត្សរ៍ឆ្នាំ១៩៧០ និង១៩៨០ បានទទួល មរណភាពក្នុងវ័យ៩០ឆ្នាំ។ លោកបានទទួលមរណភាពកាលពីច័ន្ទនៅទីក្រុងឡូស អេនជឺឡេស។
លោក Klugman បានសម្តែងជាតួស៊ើបអង្កេតផ្នែកវេជ្ជសាស្ត្រដ៏ល្បីល្បាញក្នុងរឿងភាគទូរទស្សន៍ Quincy M.E. និងជាអ្នកសរសេរកីឡាម្នាក់នៅ The Odd Couple។ តារាសម្តែងរូបនេះបានខូចសម្លេងដោយសារតែមហារីកបំពង់.កកាលពីទសវត្សរ៍ឆ្នាំ១៩៨០ ប៉ុន្តែក្រោយមកការខិតខំហ្វឹកហាត់និយាយលោកអាចនិយាយបានឡើងវិញ។ លោកបានវិលត្រឡប់មកកាន់ពិភពសម្តែងភាពយន្តក្នុងទសវត្សរ៍ឆ្នាំ១៩៩០។
ប៉ុន្មានឆ្នាំចុងក្រោយនេះលោកបានសម្តែងជាតួកិត្តិយសនៅក្នុងរឿងភាគទូរទស្សន៍ក្នុងនោះមានរឿង Third Watch និង Crossing Jordan ជាដើម។ ក្រៅពីពិភពសម្តែងលោកមានវង់ប្រណាំងសេះ និងចូលចិត្តលេងហ្គេម។
កាលពីឆ្នាំ១៩៩៦ លោកបាននិយាយថា ៖«រឿងដ៏ស្មោកគ្រោកបំផុតនៅក្នុងជីវិតរបស់ខ្ញុំគឺខ្ញុំស្អប់ការជក់បារី។ ពេលខ្ញុំឃើញគេជក់បារីតាមទីសាធារណៈ តាមទូរទស្សន៍ និងតាមខ្សែភាពយន្តជាដើមគឺធ្វើឲ្យខ្ញុំខឹងតែម្តង។ ខ្ញុំមិនចង់ឲ្យក្មេងៗឃើញសកម្មភាពបែបនេះទេ»។
តារាភាពយន្តរូបនេះមានជីវិតដ៏អស្ចារ្យបំផុត។ លោកបានរៀបអាពាហ៍ពិពាហ៍លើកទីមួយជាមួយតារាភាពយន្តកំប្លែងគឺអ្នកស្រី Brett Somers ដែលបានសម្តែងធ្វើជាតួប្រពន្ធរបស់គាត់នៅក្នុងរឿងភាគ Odd Couple។ ពួកគាត់បានរៀបការកាលពីឆ្នាំ១៩៥៣ ហើយទទួលបានកូនប្រុសពីរនាក់ឈ្មោះAdam និង David ប៉ុន្តែពួកគាត់បានឃ្លាតឆ្ងាយគ្នាបន្ទាប់ពីប្រពន្ធរបស់គាត់បានស្លាប់កាលពីឆ្នាំ២០០៧។
កាលពីខែកុម្ភៈ ឆ្នាំ២០០៨ ស្ថិតនៅក្នុងវ័យ៨៥ឆ្នាំ លោកបានរៀបការជាមួយអ្នកស្រី Peggy Crosby ដែលស្ថិតនៅជាមួយគាត់រហូតដល់ទទួលមរណៈភាព។
កូនប្រុសឈ្មោះ Adam Klugman បាននិយាយប្រាប់សារព័ត៌មានថា ៖«ឪពុករបស់គាត់មានជីវិតដ៏អស្ចារ្យ ហើយគាត់ចូលចិត្តចលនាគ្រប់ពេលវេលា ជាពិសេសគាត់អាចជួយលើកទឹកចិត្តដល់អ្នកដទៃច្រើនណាស់»។ ចំណែកកូនប្រុស David និយាយថា ៖«ខ្ញុំនិងបងប្រុសស្រលាញ់ឪពុកខ្ញុំខ្លាំងណាស់។ គាត់ជាមនុស្សដែលមានស្មារតីរឹងមាំល្អណាស់»។
ជាមួយគ្នានេះផងដែរតារាភាពយន្ត និងជាអ្នកដឹកនាំសម្តែងភាពយន្តលោក Jon Favreau បាននិយាយថា ៖«សូមគោរពលោក Klugman។ លោកតែងតែធ្វើឲ្យគ្រួសារខ្ញុំទាំងមូលសើចគ្រប់ពេលវេលា។ លោកជាបុរសដ៏អស្ចារ្យ និងជាតារាភាពយន្តដ៏មានទេពកោសល្យ។ យើងនឹងចងចាំលោកគ្រប់ពេលវេលា»៕
វេហា
