នៅ​ថ្ងៃ​ទី​២០ និង​​២១ ខែ​កក្កដា ឆ្នាំ​២០១១ គណៈកម្មាធិការ​កណ្ដាល​គណបក្ស​ប្រជាជន​កម្ពុជា បាន​ប្រារព្ធ​ពិធី​ដំណើរ​ការ​សន្និបាត​លើក​ទី​៣៦ ​របស់​ខ្លួន​យ៉ាង​មហោឡារិក ដើម្បី​ពិនិត្យ​ទៅ​លើ របាយ​ការណ៍​ស្ដីពី​សភាព​ការណ៍ និង​ការងារ​គណបក្ស​ឆ្នាំ​២០១០ ដើម​ឆ្នាំ​២០១១​និង​ទិស​ដៅ​ភារកិច្ច ចុង​ឆ្នាំ​២០១១ និង​ឆ្នាំ​២០១២ ព្រម​ទាំង​បញ្ហា​សំខាន់ៗ​ដទៃ​ជាច្រើន​ទៀត។

សន្និបាតនេះបានប្រព្រឹត្ត ឡើងក្នុងបរិយាកាសដែលប្រជាជនកម្ពុជាទូទាំងប្រទេសកំពុងអបអរសាទរជោគជ័យដ៏ត្រចះត្រចង់ ដែលតុលាការយុត្តិធម៌អន្តរជាតិទីក្រុងឡាអេទើបតែបានចេញសេចក្ដីសម្រេចកាលពីថ្ងៃទី១៨ ខែ កក្កដា ឆ្នាំ២០១១កន្លងទៅនេះ ហើយដែលរាល់សេចក្ដីសម្រេចទាំងនោះបានឆ្លើយតបយ៉ាងពេញ ទំហឹងទៅនឹងការចង់បានរបស់កម្ពុជាក្នុងការធ្វើឲ្យតំបន់ប្រាសាទព្រះវិហារមានសុខសន្តិភាព មាន អ្នកសង្កេតការណ៍អាស៊ានចូលមកក្នុងតំបន់គ្មានកងទ័ពជាបណ្ដោះអាសន្ននិងមានសកម្មភាព ផ្នែក ស៊ីវិលជាប្រក្រតី។ នេះគឺជាសមិទ្ធផលដ៏ធំធេងមួយថ្មីទៀត ដែលគណបក្សប្រជាជនកម្ពុជានិងរាជ រដ្ឋាភិបាលកម្ពុជាក្រោមការដឹកនាំដ៏ឈ្លាសវៃរបស់សម្ដេចអគ្គមហាទាំង៣សម្រេចបានក្នុងចំណោម មហាសមិទ្ធផលជាច្រើនទៀតលើគ្រប់វិស័យដែលសង្គមជាតិយើងទទួលបាន។

សន្និបាតគណៈកម្មាធិការកណ្ដាលគណបក្សប្រជាជនកម្ពុជាលើកទី៣៦ ក៏ធ្វើការពិនិត្យនិង ពិភាក្សាទៅលើភារកិច្ចសំខាន់ៗ ដែលសន្និបាតលើកទី៣៥បានដាក់ចេញ ហើយយើងពិតជាមាន មោទនភាពជាមួយស្នាដៃដែលសម្រេចបាននៅក្នុងចន្លោះនៃសន្និបាតលើកទី៣៥ មកទី៣៦នេះ ដែលក្នុងពេលនេះប្រជាជនកម្ពុជាក្រោមការដឹកនាំរបស់គណបក្សប្រជាជនកម្ពុជា សម្រេចបាន​ជោគជ័យក្នុងការថែរក្សាសន្តិភាព ស្ថេរភាព សណ្ដាប់ធ្នាប់សង្គម ការពារបានរឹងមាំគង់វង្សនូវបូរណ ភាពទឹកដី អនុវត្តន៍បានល្អគោលនយោបាយភូមិ-ឃុំមានសុវត្ថិភាព។ ជាមួយគ្នានេះ កម្ពុជាក៏ទទួល បាននូវកិត្តិយស និងកិត្យានុភាពចេះតែកើនឡើងក្នុងសកម្មភាពការងារជាមួយអង្គការពិភពលោក អង្គការក្នុងតំបន់ ជាមួយរដ្ឋាភិបាលនៃប្រទេសនានា ជាមួយគណបក្សនយោបាយនៃប្រទេសនានា និងជាមួយដៃគូអភិវឌ្ឍន៍ទាំងអស់ដែលមានទាំងទំនាក់ទំនងទ្វេភាគី និងទាំងពហុភាគី។ នៅក្នុង ដំណាក់កាលនេះដែរការប្រព្រឹត្តទៅនៃសាលាក្ដីខ្មែរក្រហមបានសម្រេចលើសំណុំរឿង០០១ និង កំពុងត្រៀមដំណើរការកាត់ក្ដីរឿង០០២ ហើយដែលគណបក្សប្រជាជនកម្ពុជាបានបង្ហាញជំហរ​យ៉ាងម៉ឺងម៉ាតក្នុងការគាំទ្រដំណើរការសាលាក្ដីខ្មែរក្រហមដើម្បីរកយុត្តិធម៌ជូនប្រជាជនកម្ពុជា ប៉ុន្តែ ត្រូវតែធានាឲ្យបានដាច់ខាតនូវសន្តិភាព ការបង្រួបបង្រួមជាតិស្របតាមស្មារតីព្រមព្រៀងនៃរាជរដ្ឋា ភិបាលកម្ពុជានិងសម្រាប់ប្រជាជនទូទៅ។

សម្រាប់ទិសដៅទៅអនាគតសន្និបាតក៏នឹងផ្ដោតការយកចិត្តទុកដាក់ទៅលើការងារសំខាន់ៗ ជាច្រើនទៀតក្នុងដំណើរឆ្ពោះទៅដណ្ដើមជោគជ័យនៅក្នុងការបោះឆ្នោតជាបន្តបន្ទាប់នាពេលខាង មុខ ដែលក្នុងនោះមានការបោះឆ្នោតជ្រើសតាំងសមាជិកព្រឹទ្ធសភា ការបោះឆ្នោតជ្រើសរើសក្រុម ប្រឹក្សាឃុំ សង្កាត់ នៅឆ្នាំ២០១២ និងបោះឆ្នោតជាតិលើកទី៥ នៅឆ្នាំ២០១៣។ គណបក្សប្រជាជន​កម្ពុជាបានជោគជ័យយ៉ាងត្រចះត្រចង់។ បទពិសោធន៍និងមេរៀនដ៏សំខាន់បំផុតរបស់គណបក្សប្រ ជាជនកម្ពុជា គឺគណបក្សមានគោលមាគ៌ានយោបាយដឹកនាំជាតិដ៏ត្រឹមត្រូវស្របតាមកាលៈទេសៈ សមស្របតាមបំណងប្រាថ្នារបស់ប្រជាជន ហើយអ្វីដែលសំខាន់បំផុតនោះគឺអំពើល្អរបស់មន្រ្តីគណ​បក្សដែលជាហេតុផលស្នូលធ្វើឲ្យប្រជាជននៅតែ​មានជំនឿ នៅតែស្រឡាញ់ និងនៅតែបោះឆ្នោត​ជូនគណបក្ស ដើម្បីគណបក្សនិងបន្តកាន់អំណាចយូរអង្វែងទៀតនៅក្នុងបរិបទ នៃសង្គមប្រជាធិប​តេយ្យទំនើប។

សូមជូនពរឲ្យសន្និបាតគណៈកម្មាធិការកណ្ដាលគណបក្សប្រជាជនកម្ពុជាលើកទី៣៦ អាណត្តិទី៥បានប្រព្រឹត្តទៅដោយជោគជ័យនិងទទួលបាននូវទស្សនៈទានថ្មីៗពីសមាជិកដែលចូល រួមដើម្បីកំណត់នូវទិសដៅសំខាន់ៗដែលត្រូវអនុវត្តន៍នាពេលខាងមុខទទួលបានផ្លែផ្កាដ៏ត្រចះ​ត្រចង់៕