ពាក្យថា « ថៃមិនចោលពុត » គឺជាតថៈភាពពិត ដែលមាននៅក្នុងអត្តៈចរិតនៃថ្នាក់ដឹកនាំថៃមួយចំនួន នាពេលបច្ចុប្បន្ននេះ ហើយគេបានពង្រីកនូវគំនិតវាតទីនិយមនោះ ដោយផ្តើមចេញពីការលួចគូសផែនទីចោរ សម្ងាត់ ជាឯកតោភាគី ពុំមានអន្តរជាតិណាទទួលស្គាល់ និងបានយកមកអនុវត្តសម្រាប់ផែនការឈ្លានពាន តាមរយៈការប្រើនូវអំពើទុច្ចរិត កលល្បិចពិសពុលគ្រប់រូបភាព ទាំងមធ្យោបាយយោធា និងការទូត ដើម្បីយកប្រៀបឈ្នះ ក្នុងការប៉ុនប៉ងរំលោភទន្ទ្រានចង់កាន់កាប់យកទឹកដីកម្ពុជា។
ក្នុងហេតុការធ្វើសង្គ្រាមជាថ្មីដែលមានការឈ្លានពានផ្នែកយោធាម្តងហើយម្តងទៀតពីសំណាក់ទាហានថៃ ដែលបានកើតមានចាប់តាំងពីថ្ងៃទី២២ ខែមេសា ឆ្នាំ ២០១១ មកនេះ ក្រោមការបញ្ជាដ៍ដាច់ខាតរបស់លោកនាយករដ្ឋមន្ត្រី អាប់ភីស៊ីត វេចាជីវ៉ាក់ និងគូរកន ក្នុងនោះក៍មានរដ្ឋមន្ត្រីការបរទេស ដែលមានជំនាញដ៍ប៉ិនប្រសព្វខាងមួលបំភ្លៃសភាពការណ៍ និងលាបពណ៌ដាក់ប្រទេសដទៃមួយរូប ផងដែរ គឺ លោក កាស៊ីត ភិរម្យ ជាមេខ្លោង បាន និងកំពុង សំដែងនូវឬទ្ធានុភាព តាំងខ្លួនធ្វើជា(ខ្លា) ឬ បងធំ នៅតំបន់អាស៊ីអាគ្នេយ៍ និងបង្កភាពអមិត្តជាមួយកម្ពុជា។
យើងសូមទាញការចាប់អារម្មណ៍ខ្លះៗពីសាធារណមតិ ជាតិ និងអន្តរជាតិ អំពីការចេញមកបកស្រាយដោយខ្វះការទទួលខុសត្រូវក្នុងឋានៈជាអ្នកការទូតរបស់ប្រទេសថៃ ដែលបាននិងកំពុងលាងសំអាតខ្លួនឯង ហើយយកភក់មកលាបដាក់លើអ្នកដទៃ តាមរយៈការចុះផ្សាយក្នុងសារព័ត៌មាន ណែវណា ថ្ងៃទី២៣ ខែ មេសា ឆ្នាំ ២០១១ លោក កាស៊ីត ភិរម្យ បានធ្វើការបដិសេធចំពោះការចោទប្រកាន់ផ្សេងៗរបស់ភាគីកម្ពុជា ដោយខំប្រឹងនិយាយថា ទាហានថៃមិនបានបាញ់មុន និងមិនធ្លាប់ឈ្លានពានកម្ពុជាទេ « ប្រសិនបើយើងឈ្លានពាន នោះមុខជាមិនបញ្ចប់ត្រឹមនេះឡើយ »។ ជាមួយនឹងការបង្ហាញពីឥរិយាបថចចេះរឹងរូសប្រកាន់យកតែយន្តការទ្វេភាគី ដែលអស់សុពលភាពទៅហើយនោះ លោក កាស៊ីត ភិរម្យ បាននិយាយអួត និងបំភ្លើសថា«យើងមិនមែនជាប្រទេសក្មេងកំឡោះចិត្តក្តៅទេ ប៉ុន្តែផ្ទុយទៅវិញ ជាប្រទេសចាស់ទុំមាននីតិវិធីច្រើន និងធ្វើការដោយតម្លាភាព» ហើយបានបន្ថែមថា ខ្លួនមិនដែលគំគួន ឬបង្ខូចលាបព៌ណអ្វីទេ មិនត្រឹមតែប៉ុណ្ណោះលោក កាស៊ីត ភិរម្យ បាននិយាយទម្លាក់កំហុសមកលើកម្ពុជា ថា ជាអ្នកបង្ករឿង និងព្រមានមកកម្ពុជាថា «មិនគួរដំណើរការអ្វីៗទាំងអស់ក្នុងរឿងរបស់អាស៊ាន និងក្រុមប្រឹក្សាសន្តិសុខអង្គសហប្រជាជាតិ ដែលមិនមែនជាសន្តិសុខដល់ប្រជាជនរបស់ប្រទេសទាំងពីរ (លោក កាស៊ីត ភិរម្យ ថ្លែងដូច្នេះ)។
សម្រាប់កម្ពុជា ជាប្រទេសតូច ប៉ុន្តែបច្ចុប្បន្នបាននិងកំពុងរស់នៅជាមួយនឹងសន្តិភាព ស្ថេរភាពនយោបាយ និងសន្តិសុខពេញផ្ទៃប្រទេស មានតែការឯកភាពជាតិ ការពារអធិបតេយ្យ បូរណភាពទឹកដីរបស់ខ្លួនឲ្យបានគង់វង្ស គឺទំហំដី១៨១,០៣៥ គីឡូម៉ែត្រក្រឡាដូចមានចែងនៅក្នុងរដ្ឋធម្មនុញ្ញរបស់ខ្លួន គឺ គ្មានហេតុផលណាដែលនឹងទៅមានគំនិតបង្កើតនូវចរន្តឬវប្បធម៌សងសឹក ទៅឈ្លានពានប្រទេសថៃនោះទេ បើទោះណាជាប្រវត្តិសាស្ត្រ ខ្មែរធ្លាប់បាត់បង់ទឹកដីទៅថៃអស់ជាច្រើនខេត្តទៅហើយក៍ពិតមែន។ ប៉ុន្តែ បើយើងក្រឡេកមើលទៅមហិច្ឆតាឈ្លានពានរបស់ប្រទេសថៃវិញ គឺលោភលន់មិនចេះឆ្អែត ហើយបានប្រើគ្រប់វិធីសាស្ត្រ ទាំងកម្លាំងយោធា និងភាពក្រឡិចក្រឡុចផ្នែកការទូត។
ពិតប្រាកដណាស់ថា ទាហានថៃបានចាប់ផ្តើមបើកការវាយប្រហារយ៉ាងគំហុកមកលើកម្ពុជាតាំងពីព្រឹកថ្ងៃទី២២ ខែមេសា ឆ្នាំ ២០១១ មក ។កងកម្លាំងថៃបានបាញ់កាំភ្លើងធំរាប់ពាន់គ្រាប់ រួមជាមួយផ្សែងពុល ហើយគ្រាប់ជាច្រើនបានបាញ់ជញ្ជ្រុំ ធ្លាក់ចូលជ្រៅចម្ងាយជាង២០គីឡូម៉ែត្រពីព្រំដែន មកលើទឹកដីកម្ពុជាចាប់ពីតំបន់ជប់គគីរ រហូតដល់ប្រាសាទតាមាន់ ប្រាសាទតាក្របី ក្នុងស្រុកបន្ទាយអំពិល ខេត្តឧត្តមានជ័យ និងតំបន់ដែលពលរដ្ឋស៊ីវិលរស់នៅ បណ្តាលឲ្យកងទ័ព និងពលរដ្ឋកម្ពុជា ស្លាប់ និងរងរបួសជាច្រើននាក់ បង្កឲ្យមានការភៀសខ្លួនអ្នកស្រុករាប់ពាន់គ្រួសារ ហើយផ្ទះរបស់ពួកគេមួយចំនួនបានឆេះខ្ទេចខ្ទីអស់។
ទង្វើល្មោភសង្គ្រាមដែលបង្កឡើងតាំងពីថ្ងៃទី១៥ ខែកក្កដា ឆ្នាំ ២០០៨ ថ្ងៃទី៤ ដល់ថ្ងៃទី៧ ខែកុម្ភៈ ឆ្នាំ ២០១១ និងការវាយប្រហារចុងក្រោយនេះ គឺបានបង្ហាញយ៉ាងច្បាស់ថា ថៃបានព្រងើយកន្តើយទៅនឹងការអំពាវនាវរបស់ក្រុមប្រឹក្សាសន្តិសុខអង្គការសហប្រជាជាតិ ដែលតម្រូវឲ្យមានការឈប់បាញ់គ្នាជាអចិន្ត្រៃយ៍ និងជាការប្រមាថមាក់ងាយដល់កិច្ចខិតខំប្រឹងប្រែងរបស់ប្រធានអាស៊ាន ដើម្បីឲ្យអនុវត្តការឈប់បាញ់គ្នានោះ តែថៃធ្វើជាគរថ្ងង់នឹងបំណងល្អរបស់សហគមន៍អន្តរជាតិ ហើយបែជាកសាងនូវកំហុសកាន់តែធ្ងន់ធ្ងរឡើងៗដោយបង្កើនការឈ្លានពានទាំងកំរោលនិងប្រឆាំងកម្ពុជាកាន់តែខ្លាំង។
សកម្មភាពគំរាមកំហែងឈ្លានពានយ៉ាងឃោរឃៅទាំងនេះពីសំណាក់ទាហានល្មោភសង្គ្រាមរបស់ថៃ គឺរដ្ឋាភិបាលនៃប្រទេសថៃមិនអាចប្រកែកបានឡើយ ហើយការប៉ុនប៉ងដណ្តើមកាន់កាប់ប្រាសាទតាមាន់ ប្រាសាទតាក្របី ឬក៍តំបន់ជុំវិញប្រាសាទព្រះវិហារដែលជារបស់កម្ពុជា គឺជាហេតុផលសមរម្យបំផុតដែលបញ្ជាក់យ៉ាងច្បាស់ពីបំណងវាតទីនិយម ជាមួយនឹងការរំលោភនូវរាល់ច្បាប់អន្តរជាតិ ធម្មនុញ្ញអង្គការសហប្រជាជាតិ ជាពិសេសស្មារតីរួមរបស់ក្រុមប្រឹក្សាសន្តិសុខអង្គការសហប្រជាជាតិ និងការសម្របសម្រួលរបស់ប្រធានអាស៊ាន ក្នុងកិច្ចប្រឹងប្រែងធ្វើឲ្យមានការឈប់បាញ់គ្នាជាអចិន្ត្រៃយ៍ ដែលថៃគ្មានសុឆន្ទៈក្នុងការបញ្ចប់បញ្ហាឈ្លានពាន ឬហ៊ានទទួលការពិតនៅលើឆាកអន្តរជាតិឡើយ។ វត្តមានរបស់អ្នកសង្កេតការណ៍អព្យាក្រិត គឺជាសាក្សីដ៍សំខាន់ដើម្បីស្វែងរកការពិត ថាតើ ប្រទេសណាជាអ្នកបង្ករឿងឈ្លានពានគេមុន ដែលសំណើរនេះខាងភាគីកម្ពុជាបានឯកភាពទាំងស្រុងដោយឥតលក្ខខ័ណ្ឌ ។ ចំណែកឯភាគីថៃវិញរហូតមកដល់ពេលនេះគ្មានចំលើយច្បាស់លាស់ឡើយ នេះគឺជាចេតនាបិទបាំងការពិត មិនត្រឹមជាការដែលថៃប្រកាសខ្លួនធ្វើសត្រូវជាមួយតែកម្ពុជាប៉ុណ្ណោះទេ គឺមានតម្លៃស្មើនឹងការចង់ធ្វើសត្រូវជាមួយពិភពលោកទាំងមូល។
ដូច្នេះ ការចេញមុខមកក្រឡៃស្ថានការណ៍ពិតនៅពីក្រោយការបង្កឧក្រិដ្ឋកម្មសង្គ្រាមវាយប្រហារមកលើកម្ពុជា ដោយអ្នកការទូតថៃ លោក កាស៊ីត ភិរម្យ តំណាងឲ្យរដ្ឋាភិបាលថៃ គឺមិនសិក្តសមជាអ្នកការទូតសុច្ចរិត ដែលតំណាងឲ្យប្រទេសជិតខាងដែលស្រឡាញ់សន្តិភាពនោះទេ ទង្វើនោះគឺគ្រាន់តែជាការឃោសនានយោបាយទុច្ចរិតរបស់ប្រទេសមួយដែលប៉ុនប៉ងបង្វែសភាពការណ៍តានតឹង និងវិបត្តផ្ទៃក្នុងធ្ងន់ធ្ងរ ដោះស្រាយពុំរួចក្នុងប្រទេសខ្លួន និងដើម្បីបំរើផលប្រយោជន៍នយោបាយរបស់រដ្ឋាភិបាលមួយ ដែលទើបតែបានប្រកាសថានឹងរំលាយសភា ហើយត្រៀមរៀបចំធ្វើការបោះឆ្នោតនាពេលខាងមុខ ទើបថ្នាក់ដឹកនាំថៃបង្កើតឡើងនូវការធ្វើសង្គ្រាមបែបនេះមកលើកម្ពុជា ដើម្បីទាក់ទាញរកសម្លេងឆ្នោតតែប៉ុណ្ណោះ ៕
ទិត សុធា
| < មុន | បន្ទាប់ > |
|---|
