ក្នុងពេលដែលការបោះឆ្នោតជ្រើសតាំងតំណាងរាស្ត្រកាន់តែឈានចូលមកដល់ ក្រុមប្រឆាំងក៏កំពុងតែដំឡើងសំឡេងក្នុងយុទ្ធនាការភូតកុហក បោកប្រាស់យ៉ាងអាក្រក់អាក្រីបំផុតដោយមិនចេះខ្មាសអៀនបន្តិចណាសោះ។ ពួកគេកំពុងតែយល់ថា ប្រជាជនកម្ពុជាជាមនុស្សដែលងាយនឹងភូតកុហកបាន ចង់ពួកក្រុមប្រឆាំងនិយាយអ្វី ភូតកុហកអ្វី ភូតកុហកបែបណាក៏ប្រជាជនជឿតាមពួកគេដែរ។ ប៉ុន្តែក្រុមប្រឆាំងកំពុងតែយល់ខុសហើយ ព្រោះថា សំដីភូតកុហក ឃោសនាបោកប្រាស់បែបនេះ មិនត្រឹមតែធ្វើឲ្យក្រុមគេកាន់តែបាត់បង់ជំនឿពីប្រជាពលរដ្ឋប៉ុណ្ណោះទេ ប៉ុន្តែវាបង្ហាញឲ្យឃើញច្បាស់ថាពួកនេះកំពុងតែមើលងាយមើលថោកប្រជាជនកម្ពុជាហើយ។
ពួកគេភូតកុហកថា បើកពួកគេឈ្នះឆ្នោត គេនឹងដំឡើងប្រាក់ខែដល់កម្មករ មន្ត្រីរាជការ លុបបំបាត់អំពើពុករលួយ ដែលសំដៅឃោសនាអកុសលបែបនេះសូម្បីតែកូនបៀមដៃក៏អាចនិយាយបានដែរ ព្រោះវាគ្រាន់តែជាការនិយាយប៉ុណ្ណោះ។ លើភាពជាក់ស្ដែងជនបោកប្រាស់ទាំងនេះមិនអាចធ្វើបានទេ ពីព្រោះថា រាជរដ្ឋាភិបាលកម្ពុជា បច្ចុប្បន្នដែលកំពុងដឹកនាំប្រទេសពិតជាចង់ដំឡើងប្រាក់ខែឲ្យបានខ្ពស់ជាងនេះ ប៉ុន្តែទំហំសេដ្ឋកិច្ចរបស់យើងមិនទាន់ធ្វើទៅបាន។ យើងនឹងដំណើរកាន់ដំឡើងប្រាក់ខែនេះមួយជំហានម្ដងៗដូចដែលបានធ្វើកន្លងមកហើយ។ ពួកប្រឆាំងមិនយល់ពីបញ្ហានេះទេ ប៉ុន្តែពួកគេពិតជាមានចេតនាអាក្រក់ជួជាតិបំផុតហ៊ានឃោសនាភូតកុហកប្រជាជនបែបនេះទៅកើត។ ពួកគេនេះមិនបានគិតគូរទៅដល់ជោគវាសនារបស់ជាតិ មិនបានគិតទៅដល់ផលប្រយោជន៍របស់ប្រជាជនបន្តិចណាសោះ គឺគិតតែផលប្រយោជន៍របស់ខ្លួន ហើយហ៊ានបោកប្រាស់ប្រជាជនបែបនេះទៅកើត។
នៅពេលដែលគណបក្សប្រជាជនកម្ពុជាលើកឡើងពីទិសដៅនៃការអភិវឌ្ឍន៍ប្រទេសទៅថ្ងៃអនាគតដោយបានដាក់ចេញកម្មវិធីនយោបាយនៅលើគ្រប់វិស័យទាំងអស់ ដោយបានឆ្លងកាត់ការប្រជុំពិភាក្សាគ្នាយ៉ាងក្បោះក្បាយនិងសុំជម្រៅ ក្រុមប្រឆាំងគ្រាន់តែដើរនិយាយច្បោលតាមតែចិត្តនឹកឃើញ គ្មានទិសដៅច្បាស់លាស់ គ្មានផែនការត្រឹមត្រូវ គ្មានគោលនយោបាយជាក់ស្ដែងណាមួយឡើយ។ យើងត្រូវធ្វើការដកពិសោធន៍ថា នៅពេលដែលគណបក្សប្រជាជនកម្ពុជា កំពុងដឹកនាំប្រទេសមានផែនការកម្មវិធីច្បាស់លាស់ មានគោលការណ៍អនុវត្តពីមួយដំណាក់កាលទៅមួយដំណាក់កាល ក៏គង់មានផែនការខ្លះនៅមិនទាន់អនុវត្តបានជោគជ័យទាំងស្រុងផង ចុះទម្រាំតែក្រុមមនុស្សរវើរវាយគ្រាន់តែដើរស្រែកកោកកាកៗតាមតែចិត្តនឹកឃើញ តើពួកគេអាចនឹងសម្រេចបានជោគជ័យដែរឬទេ? តើប្រជាជនកម្ពុជាផ្ញើវាសនារបស់ខ្លួនទៅលើពួកមនុស្សធុននេះទេ? ជោគវាសនារបស់យើងម្នាក់ៗពិតជាមានតម្លៃខ្ពស់ណាស់។ ជោគវាសនារបស់មាតុភូមិកម្ពុជាយើងក៏រឹតតែខ្ពស់ឧត្ដុង្គឧត្ដមជាងនេះទៅទៀត ហើយជោគវាសនាមាតុភូមិនេះបានផ្ញើទាំងស្រុងមកលើបាតដៃរបស់យើងទាំងអស់គ្នា។ តើយើងគួរប្រថុយប្រថានយកជោគវាសនានេះទៅប្រលែងលេងជាមួយពួកភូតកុហកបានដែរឬទេ? បទពិសោធន៍ជាច្រើននៅក្នុងប្រវត្តិសាស្ត្របានបង្ហាញឲ្យប្រជាជនកម្ពុជាយើងបានឃើញទាំងអស់គ្នាហើយ។ ៣៤ឆ្នាំកន្លងផុតទៅ គឺជាកំណាត់ផ្លូវដ៏វែងឆ្ងាយដែលយើងបានឆ្លងកាត់។ បើធ្វើការប្រៀបធៀបគឺយើងកំពុងតែស្ថិតនៅលើសំពៅដ៏ធំ ដែលកំពុងលូនកាត់ក្នុងល្បឿនដ៏លឿនពុះជ្រែកមហាសាគរ តើយើងលោតទៅតោងធុងកំបែកមាត់មួយ ដែលអណ្ដាតប៉ែលប៉ោលនៅក្នុងមហាសាគរទៅវិញឬ? នេះគឺជាសំណួរយ៉ាងសាមញ្ញ។ ប៉ុន្តែតាមពិតទៅប្រជាជនកម្ពុជាលោកលោកមានការយល់ដឹងច្បាស់លាស់ណាស់។ លោកមានការយល់ដឹងខ្ពស់ជាង ជ្រាលជ្រៅជាង និង សំបូរបទពិសោធន៍ជាងពពួកជនភូតកុហកបោកប្រាស់ទាំងនោះទៅទៀត។
ប៉ុន្តែទោះយ៉ាងណាក៏ដោយអំបូរភូតកុហកបោកប្រាស់គឺវានៅតែភូតកុហក បោកប្រាស់ដដែល។ សូមបន្តឲ្យពួកគាត់ភូតកុហកបោកប្រាស់ទៀតចុះ ប៉ុន្តែការសម្រេចចិត្តគឺនៅលើប្រជាជន។ នៅពេលដែលប្រជាជនសម្រេចចិត្តមិនគាំទ្រពួកគេសូមកុំចោទប្រជាជនឲ្យសោះ ព្រោះនោះគឺជាការសម្រេចចិត្តដ៏ត្រឹមត្រូវរបស់ប្រជាជន៕
លីទួង
| < មុន | បន្ទាប់ > |
|---|
