នៅថ្ងៃទី៣០ ខែវិច្ឆិកាឆ្នាំ២០១២សម្ដេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាបានធ្វើការរំលឹកជាថ្មីម្ដងទៀតព្រមទាំងព្រមានទៅលើមន្ត្រីដឹកនាំដែលទទួលខុសត្រូវដឹកនាំបង្ក្រាបនិងត្រួតពិនិត្យបទល្មើសជលផលត្រូវឈប់បន្តស្ពឹកស្រពន់ហើយរួតរះយកចិត្តទុកដាក់អនុវត្តបំពេញការងារឲ្យបានសកម្មពីព្រោះថាបច្ចុប្បន្ននេះបទល្មើសនេសាទបាននិងកំពុងកើតឡើងយ៉ាងពេញបន្ទុកទៀតហើយ។ សម្ដេចតេជោហ៊ុន សែនសំដែងការសង្ស័យថា មានមន្ត្រីខ្លះកំពុងតែមានចេតនាអនុវត្តវិធីរុញឲ្យខ្លោចរោចឲ្យឆៅនូវកម្មវិធីកំណែទម្រង់ជលផលដើម្បីបង្ហាញឲ្យឃើញថាកំណែទម្រង់មួយនេះមានលក្ខណៈខុសឆ្គង ហើយប៉ុនប៉ងបង្កើតឲ្យមានឡូត៍នេសាទដែលត្រួតត្រាដោយថៅកែឡូត៍ឡើងវិញ។ ទោះជាយ៉ាងនេះក្ដីគេត្រូវតែចងចាំថាសម្ដេចតេជោ ហ៊ុន សែនបានធ្វើការប្រកាសកំណែទម្រង់ដាច់ណាត់ និងមិនដកថយជាដាច់ខាតក្នុងវិស័យជលផល ហើយនេះមានលក្ខណៈជាកំណែទម្រង់ជាប្រវត្តសាស្ត្រទៀតផង។
គួររំលឹកថានៅថ្ងៃទី៨ ខែមីនា ឆ្នាំ២០១២ សម្ដេចតេជោ ហ៊ុន សែន បានប្រកាសជាសាធារណៈលុបចោលជាស្ថាពរនូវឡូត៍នេសាទទូទាំងប្រទេសដោយបើកចំហឲ្យមានការនេសាទជាលក្ខណៈគ្រួសារមិនចាំបាច់បង់ពន្ធជូនរដ្ឋ ដោយប្រើប្រាស់ឧបករណ៍នេសាទស្របច្បាប់ និងបានប្រកាសទុកតំបន់មួយចំនួនជាដែននេសាទអភិរក្ស។ សេចក្ដីប្រកាសជាប្រវត្តិសាស្ត្រនេះមានន័យថា ឡូត៍នេសាទទូទាំងប្រទេសដែលមានអាយុកាលប្រមាណ១០៤ឆ្នាំកន្លងទៅហើយនោះ នឹងត្រូវរំលាយចោលទាំងស្រុងពោលគឺនៅកម្ពុជាមិនមានឡូត៍នេសាទដែលត្រួតត្រាដោយថៅកែឡូត៍ទៀតទេ។ តាំងពីក្រោយឆ្នាំ១៩៧៩ ក្រោយពេលដែលប្រទេសជាតិត្រូវបានរំដោះឡូត៍នេសាទត្រូវបានស្ដារឡើងវិញ និងត្រូវបានកែសម្រួលជាបន្តបន្ទាប់តាមស្ថានភាពជាក់ស្ដែងនៃសភាពការណ៍ក្នុងដំណាក់កាលនិមួយៗ ហេតុនេះហើយទើបគេឃើញថាមានការកែទម្រង់លើវិស័យជលផលនេះជាច្រើនដំណាក់។ កំណែទម្រង់ដំណាក់កាលទី១ សម្ដេចតេជោ ហ៊ុន សែន បានប្រកាសកាត់ដែនឡូត៍នេសាទចំនួន៥៣៨៥២២ហិកតា ស្មើនឹង៥៦ភាគរយនៃឡូត៍សរុបដើម្បីយកមកធ្វើជាឡូត៍អាករភូមិជូនប្រជាជនវិញដែលកំណែទម្រង់ដំណាក់កាលនេះបានផ្ដល់ផលប្រយោជន៍ខាងសង្គមសេដ្ឋកិច្ចដល់ប្រជាជន ហើយនេះជាការអនុវត្តយ៉ាងត្រឹមត្រូវនូវគោលនយោបាយនៃការចែករំលែកផ្លែផ្កានៃកំណើនសេដ្ឋកិច្ចប្រកបដោយសមធម៌។ កំណែទម្រង់ដំណាក់កាលទី១នេះមិនទាន់ដោះស្រាយបានបញ្ហាជាស្ថាពរនៅឡើយទេ ពីព្រោះថាឡូត៍នេសាទដែលនៅសេសសល់ក្រោមការត្រួតត្រារបស់ថៅកែឡូត៍នៅតែបង្កើតឲ្យមានបាតុភាពអវិជ្ជមានជាច្រើន ការបំផ្លិចបំផ្លាញត្រីស្ទើរដាច់ពូជ។ ម្ចាស់ឡូត៍នេសាទខ្លះតាំងខ្លួនធ្វើជាស្ដេចត្រាញ់នៅលើឡូត៍ដែលខ្លួនគ្រប់គ្រងសូម្បីតែប្រជាជនចូលនេសាទជាលក្ខណៈគ្រួសារបន្តិចបន្តួចឬសូម្បីតែអុំទូកឆ្លងកាត់ដែននេសាទនោះក៏ត្រូវគេបាញ់ គេចាប់ដាក់គុកដាក់ច្រវាក់ដែរ។ លើសពីនេះទៅទៀតឡូត៍ដែលនៅសេសសល់នេះត្រូវបានថៅកែឡូត៍បង្កើតឲ្យមានភាពអនាធិបតេយ្យដាក់សម្រាស់ ដាក់ធ្នួស ព្រួល សាងសង់សំណង់កាត់ទទឹងទន្លេ ព្រែកបឹងបួ បង្កការលំបាកដល់ការបំលាស់ទីរបស់មច្ឆាជាតិគ្រប់ប្រភេទ និងធ្វើឲ្យគោករាក់យ៉ាងឆាប់រហ័សដល់ទន្លេស្ទឹង បឹងព្រែកផងដែរ។ ដោយមើលឃើញពីភាពអវិជ្ជមានទាំងនេះទើបរាជរដ្ឋាភិបាលកម្ពុជាចេញបទបញ្ជាលេខ០១ប.ប ចុះថ្ងៃទី២២ ខែឧសភា ឆ្នាំ២០១១ ចាត់វិធានការលុបបំបាត់ភាពអនាធិបតេយ្យទាំងនេះដើម្បីការពារទន្លេសាប និងលុបបំបាត់ភាពអនាធិបតេយ្យ និងបទល្មើសដែលកើតមានក្នុងទន្លេសាប។ បន្ទាប់មកក៏មានសារាចរណ៍ណែនាំលេខ០៩ សរណន ចុះថ្ងៃទី២៦ ខែសីហា ឆ្នាំ២០១១ ស្ដីពីការគ្រប់គ្រងឡូត៍នេសាទដែលបានដកហូតចំនួន៣៥ឡូត៍ក្នុងខេត្តបាត់ដំបង សៀមរាប កំពង់ធំ កំពង់ឆ្នាំង និងខេត្តពោធិ៍សាត់។ នៅថ្ងៃទី២៨ ខែកុម្ភៈ ឆ្នាំ២០១២ សម្ដេចតេជោ ហ៊ុន សែន បានប្រកាសជាសាធារណៈសម្រេចលុបចោលឡូត៍នេសាទទាំងអស់នៅលើផ្ទៃបឹងទន្លេសាប។ រាជរដ្ឋាភិបាលកម្ពុជាបានដាក់ចេញអនុក្រឹត្យលេខ៣៧អនក្រ.បក ស្ដីពីការលុបចោលឡូត៍នេសាទជុំវិញបឹងទន្លេសាបក្នុងខេត្តបាត់ដំបង បន្ទាយមានជ័យ សៀមរាប ពោធិ៍សាត់ កំពង់ឆ្នាំង និងខេត្តកំពង់ធំ ទុកសម្រាប់ប្រជាពលរដ្ឋធ្វើនេសាទជាលក្ខណៈគ្រួសារ និងជាកន្លែងអភិរក្សជលផល។ នៅថ្ងៃទី៥ ខែមីនាឆ្នាំ២០១២ រាជរដ្ឋាភិបាលកម្ពុជាបានដាក់ចេញអនុក្រឹត្យលេខ៣៥ អនក្រ.បក ស្ដីពីការរំលាយឡូត៍នេសាទក្នុងខេត្ត កណ្ដាល កំពង់ចាម ព្រៃវែង និងខេត្តតាកែវ និងរៀបចំជាកន្លែងអភិរក្សជលផល។ សម្ដេចតេជោ ហ៊ុន សែនបានប្រកាសថា នេះជាកំណែទម្រង់ដំណាក់កាលទី២ ជាដំណាក់កាលផ្ដាច់ព្រ័ត្រ ជាវិធានការដាច់ខាតមួយគឺ យើងត្រូវបិទក្រោលសេះមុនសេះចេញផុតពីក្រោល។ នេះគឺជាការអនុវត្តកំណែទម្រង់ជលផល ដ៏ជ្រាលជ្រៅ ម៉ឺងម៉ាត់ ដាច់ណាត់ ស៊ីជម្រៅ និងមិនដកថយជាដាច់ខាត។ ជាមួយគ្នានេះរាជរដ្ឋាភិបាលកម្ពុជាក៏បានបង្កើតយន្តការជាច្រើនក្នុងការបង្ក្រាប ការឃ្លាំមើល ការធ្វើអធិការកិច្ចចំពោះបទល្មើសនេសាទ ប៉ុន្តែទីបំផុតនៅតែមានសេះរបូតរួចចេញផុតពីក្រោលដដែល ដែលសម្ដេចបានបន្ទោសទៅលើមន្ត្រីស្ពឹកស្រពន់។
ឈ្មួញតែងតែមានល្បិចកលសព្វបែបយ៉ាងដើម្បីកេងយកផលចំណេញទោះជាត្រូវធ្វើដោយពិធីណាក៏ដោយ ប៉ុន្តែសំខាន់នៅលើមន្ត្រីរបស់យើង តើមានឆន្ទៈពិតប្រាកដក្នុងការអនុវត្តបទបញ្ជារបស់រាជរដ្ឋាភិបាលឬអត់? ជាការពិតហើយបើគ្មានការស៊ុមគ្រលុំ ពីមន្ត្រីពាក់ព័ន្ធនានាមួយចំនួនទេនោះបទល្មើសនេសាទដែលកំពុងតែកើតមានបច្ចុប្បន្ននេះក៏មិនអាចលេចជារូបរាងបានដែរ។ ហេតុនេះមន្ត្រីជលផល អាជ្ញាធរដែនដី គ្រប់លំដាប់ថ្នាក់ដែលជាអ្នកអនុវត្តនូវកំណែទម្រង់ជលផល ដែលរាជរដ្ឋាភិបាលបានដាក់ចេញ ហើយដែលអស់លោកក៏កំពុងធ្វើជាភ្នែក ច្រមុះ និងជាសេនាធិការឲ្យរាជរដ្ឋាភិបាល គួរគប្បីពង្រឹងមនសិការស្នេហាជាតិ ដើម្បីដោះស្រាយបញ្ហានេះកុំឲ្យកើតមានតទៅទៀត និងកុំទុកឲ្យវានៅតែជារឿងដដែលៗ ដើម្បីមានពេលវេលាដោះស្រាយបញ្ហាដទៃទៀតជូនប្រជាជនយើង។
មន្ត្រីគ្រប់រូបក៏គប្បីមើលឃើញឲ្យច្បាស់ថាកំណែទម្រង់វិស័យជលផលទាំង២ដំណាក់កាលនេះត្រូវបានប្រជាជនទូទាំងប្រទេសអបអរសាទរ និងគាំទ្រនូវគំនិតផ្ដួចផ្ដើមប្រកបដោយគិតបណ្ឌិតរបស់សម្ដេចតេជោ ហ៊ុន សែន ក្នុងនាមជាប្រមុខនៃរាជរដ្ឋាភិបាល និងគណបក្សប្រជាជនកម្ពុជាដែលជានិច្ចកាលតែងគិតគូរដល់សុខទុក្ខប្រជាជន និងជួយឧបត្ថម្ភគាំទ្រដល់ប្រជាជនគ្រប់ពេលវេលា។ ជាពិសេសសេចក្ដីប្រកាសជាចំហរបស់សម្ដេចតេជោ ហ៊ុន សែន ដែលថា បើគណបក្សប្រជាជននៅកាន់អំណាច គឺមិនអនុញ្ញាតឲ្យមានឡូត៍នេសាទទទៅទៀត នេះជាគោលនយោបាយដ៏ត្រឹមត្រូវដែលមានគោលដៅជាក់លាក់បម្រើឲ្យផលប្រយោជន៍ប្រជាជនពិតប្រាកដ និងទទួលបាននូវការគាំទ្រពីប្រជាជនគ្រប់កាលៈទេសៈទាំងអស់៕
(កម្ពុជាថ្មី)
| < មុន | បន្ទាប់ > |
|---|
