កាលពីពេលថ្មីៗកន្លងទៅនេះ រាជរដ្ឋាភិបាលកម្ពុជាបានចេញផ្សាយនូវសេចក្ដីថ្លែងការណ៍មួយ ដែលនិយាយអំពីវិធានការមួយចំនួន ដើម្បីបង្កលក្ខណៈងាយស្រួលដល់អាជ្ញាធរមានសមត្ថកិច្ចរបស់ រាជរដ្ឋាភិបាល ក្នុងការដោះស្រាយការទាមទាតវ៉ានានាសិទ្ធិកាន់កាប់ដីធ្លីឲ្យបានឆាប់រហ័ស និងសម ស្របទៅតាមច្បាប់ ព្រមទាំងដើម្បីរក្សារួមគ្នារក្សាការពារសន្តិសុខសណ្ដាប់ធ្នាប់សង្គមផងដែរ។
ក្នុងសេចក្ដីថ្លែងការណ៍ដែលមាន ៣ ចំណុចបាននិយាយថា ១-ប្រជាពលរដ្ឋដែលទាមទារសិទ្ធិ កាន់កាប់ដីធ្លី ដោយសារដីធ្លីរបស់ងប្អូនដែលកំពុងកាន់កាប់ស្របច្បាប់ពិតប្រាកដ ត្រូវបានរំលោភឬប្រ ជាពលរដ្ឋដែលពុំមានដីធ្លីសម្រាប់បង្កបង្កើនផល និងសង់លំនៅដ្ឋានសូមបងប្អូនធ្វើពាក្យបណ្តឹង ឬ ពាក្យស្នើសុំមកអាជ្ញាធរមានសមត្ថកិច្ចរបស់រាជរដ្ឋាភិបាល ឬអាចធ្វើការទាមទារតវ៉ាដោយសន្តិវិធីស្រប ទៅតាមច្បាប់ជាមួយយអាជ្ញាធរមានសមត្ថកិច្ចនៃរាជរដ្ឋាភិបាល ដើម្បីអាជ្ញាធរមានសមត្ថកិច្ចធ្វើការដោះ ស្រាយជូនស្របទៅតាមនីតិជាធរមាន ។ ក្នុងការដោះស្រាយបែងចែកដីធ្លីឬការផ្តល់សិទ្ធិកាន់កាប់ដី ធ្លីជូនប្រជាពលរដ្ឋ មិនមានមជ្ឈដ្ឋានណាមួយអាចធ្វើការដោះស្រាយបានក្រៅពីអាជ្ញាធររដ្ឋបាន ឡើយ។២-អាជ្ញាធរ និងកងកម្លាំងមានសមត្ថកិច្ចគ្រប់លំដាប់ថ្នាក់ ត្រូវបង្កលក្ខណៈសម្បត្តិគ្រប់បែប យ៉ាងក្នុងការការពារសិទ្ធិសេរីភាពរបស់ប្រជាពលរដ្ឋ ក្នុងការបញ្ចេញមតិ និងទាមទារតវ៉ានានាដោយ សន្តិវិធី ហើយត្រូវរួសរាន់ទទួលដោះស្រាយសំណូមពរឬការទាមទារតវ៉ានានារបស់ប្រជាពលរដ្ឋក្នុង ក្របខណ្ឌ តួនាទី សមត្ថកិច្ចរៀងៗខ្លួន។រាជរដ្ឋាភិបាលសូមស្វាគមន៍ចំពោះអ្នកពាក់ព័ន្ធនានា ក្នុងការ ចូលរួមក្នុងភាពជាដៃគូជាមួយរាជរដ្ឋាភិបាល ក្នុងការដោះស្រាយបញ្ហាប្រឈមនានាជុំវិញបញ្ហាដីធ្លី របស់ប្រជាពលរដ្ឋ ក៏ដូចជាបញ្ហាប្រឈមនានាក្នុងសង្គម ដើម្បីលើកកម្ពស់តម្លាភាព គណនេយ្យភាព លើមូលដ្ឋាននៃការគោរពច្បាប់ និងការរួមគ្នាថែរក្សាសន្តិសុខ សណ្តាប់ធ្នាប់របៀបរៀបរយសង្គម និង ៣-រាល់ការទាមទារតវ៉ានានា ត្រូវរួមគ្នាគោរពច្បាប់ និងការរក្សាសន្តិសុខ សណ្តាប់ធ្នាប់ របៀបរៀបរយ សាធារណៈ ព្រមទាំងត្រូវខិតខំចៀសវាងឲ្យបាននូវអំពើហិង្សាគ្រប់រូបភាពផងដែរ។
ការចេញនូវសេចក្ដីថ្លែងការណ៍ស្តីពីបញ្ហាដីធ្លីនេះ របស់រាជរដ្ឋាភិបាល ពិតជាមានការជាប់ពាក់ព័ន្ធជាមួយនឹងបញ្ហាជាក់ស្តែងមួយចំនួនរបស់សង្គមកម្ពុជា កាលពីពេលកន្លងមក ក៏ដូចជានៅក្នុង ពេលបច្ចុប្បន្ននេះផងដែរ។នៅក្នុងទិដ្ឋភាពជាក់ស្តែង ប្រជាពលរដ្ឋដែលមានដីធ្លីជាកម្មសិទ្ធិស្របច្បាប់ របស់ខ្លួនត្រូវបានរំលោភ ឬប្រជាពលរដ្ឋដែលមានការខ្វះខាតដីធ្លីតែងតែធ្វើពាក្យបណ្តឹង ឬដាក់លិខិត ស្នើសុំមកអាជ្ញាធរមានសមត្ថកិច្ចរបស់រាជរដ្ឋាភិបាល ឬធ្វើការប្រមូលផ្តុំទាមទារតវ៉ាដោយសន្តិវិធី។ ប៉ុន្តែក្នុងពេលថ្មីៗនេះមានតំបន់ខ្លះបានកើតមានការទាមទារតវ៉ាមួយចំនួន ដែលបានធ្វើឲ្យប៉ះពាល់ដល់ សណ្ដាប់ធ្នាប់សាធារណៈ ដោយប្រមូលផ្តុំបិទផ្លូវជាតិបណ្តាលឲ្យកកស្ទះចរាចរអស់ជាច្រើនម៉ោង ហើយការទាមទាតវ៉ាខ្លះទៀតក៏បានប្រែក្លាយេជាអំពើហិង្សា ដែលនាំឲ្យប៉ះពាល់ដល់អាយុជីវិតប្រជា ពលរដ្ឋ និងកងកម្លាំងមានសមត្ថកិច្ចមួយចំនួនថែមទៀតផង។ទន្ទឹមនេះ មានការទាមទារខ្លះត្រូវបាន មជ្ឈដ្ឋានមួយចំនួនបំផុសបំផុលប្រជាពលរដ្ឋ ដោយតាំងខ្លួនដូចអាជ្ញាធរមានសមត្ថកិច្ចរបស់រាជ រដ្ឋាភិបាល ធ្វើការសន្យាជួយប្រជាពលរដ្ឋ អំពីការបែងចែកដីធ្លី ឬធ្វើការចាត់តាំងអំពីការបែងចែកដីធ្លី ដែលកំពុងមានការទាមរទាតវ៉ា ជាហេតុធ្វើឲ្យការដោះស្រាយការទាមទារតវ៉ានោះកាន់តែមានភាពស្មុគស្មាញថែមទៀត។
ជាពិតណាស់ អាជ្ញាធរមានសមត្ថកិច្ចគ្រប់លំដាប់ថ្នាក់នៃរាជរដ្ឋាភិបាល បាន និងកំពុងខិតខំ យកចិត្តទុកដាក់យ៉ាងសកម្មក្នុងការស្រាវជ្រាវ ដើម្បីដោះស្រាយការទាមទាតវ៉ារបស់បងប្អូនប្រជាពល រដ្ឋឪ្យបានសមស្របបំផុតស្របទៅតាមនីតិវិធី ហើយជានិច្ចកាលរាជរដ្ឋាភិបាលតែងតែខិតខំក្នុងការ ការពារលើកស្ទួយសិទ្ធិសេរីភាពរបស់ប្រជាពលរដ្ឋក្នុងការបញ្ចេញមតិ និងការទាមទាតវ៉ាដោយសន្តិវិធី ស្របទៅតាមច្បាប់។
រាជរដ្ឋាភិបាលបានបង្ហាញនូវក្តីសង្ឃឹមយ៉ាងមុតមាំថា ប្រជាពលរដ្ឋ អាជ្ញាធរមានសមត្ថកិច្ច គ្រប់លំដាប់ថ្នាក់ និងអ្នកពាក់ព័ន្ធនានានឹងចូលរួមឲ្យបានកាន់តែសកម្មថែមទៀតជាមួយរាជរដ្ឋាភិបាល ក្នុងការលើកកម្ពស់សិទ្ធិ សេរីភាពរបស់ប្រជាពលរដ្ឋ និងការដោះស្រាយការទាមទារតវ៉ានានារបស់ ប្រជាពលរដ្ឋប្រកបដោយតម្លាភាព គណនេយ្យភាព និងរក្សាសន្តិសុខ សណ្តាប់ធ្នាប់សង្គម។
ពិតហើយ ដើម្បីឲ្យសេចក្ដីថ្លែងការណ៍របស់រាជរដ្ឋាភិបាលសម្រេចជោគជ័យទៅបានលុះត្រា តែមានការចូលរួមជាសំខាន់ពីសំណាក់ប្រជាពលរដ្ឋ បើទោះបីជាបងប្អូនមានដីធ្លីស្របច្បាប់ពិតប្រាកដ ត្រូវបានរំលោភ ឬប្រជាពលរដ្ឋដែលពុំមានដីធ្លីសម្រាប់បង្កបង្កើនផល និងសង់លំនៅដ្ឋានក្តី សូមបង ប្អូនធ្វើពាក្យបណ្តឹង ឬពាក្យស្នើសុំមកអាជ្ញាធរមានសមត្ថកិច្ចរបស់រាជរដ្ឋាភិបាល ឬអាចធ្វើការទាមទារ តវ៉ា ដោយសន្តិវិធីស្របទៅតាមច្បាប់ជាមួយអាជ្ញាធរមានសមត្ថកិច្ចនៃរាជរដ្ឋាភិបាល ដើម្បីអាជ្ញាធរ មានសមត្ថកិច្ចធ្វើការដោះស្រាយជូនស្របទៅតាមនីតិជាធរមាន។បងប្អូនប្រជាពលរដ្ឋត្រូវតែយល់ឲ្យបានច្បាស់ថា គឺមានតែអាជ្ញាធរមានសមត្ថកិច្ចរបស់រាជរដ្ឋាភិបាលប៉ុណ្ណោះដែលអាចជួយដោះស្រាយ ជូនប្រជាពលរដ្ឋបានត្រូវបាន ហើយសូមកុំជឿតាមមជ្ឈដ្ឋានមួយចំនួនដែលបានបំផុសបំផុលប្រជាពលរដ្ឋដោយតាំងខ្លួន«ដូចអាជ្ញាធរមានសមត្ថកិច្ចរបស់រាជរដ្ឋាភិបាល»ធ្វើការសន្យាជួយប្រជាពលរដ្ឋអំពីការបែងចែកដីធ្លី ឬធ្វើការចាត់តាំងអំពីការបែងចែកដីធ្លី ដែលកំពុងមានការទាមទារតវ៉ា ព្រោះថា វាគ្រាន់តែជាការបោលប្រាស់ភូតកុហក ដើម្បីបំពុលសភាពការណ៍ធ្វើឲ្យស្រអាប់ដល់កិត្តិយសរាជរដ្ឋាភិបាល និងធ្វើឲ្យបញ្ហាកាន់តែស្មុគស្មាញឡើងៗតែប៉ុណ្ណោះ៕
ស្នាយពល
| < មុន | បន្ទាប់ > |
|---|
